13 persona lënduar gjatë protestës në Tiranë, tre me dëmtime në sy

Gjatë protestës në Tiranë, 13 persona kanë kërkuar ndihmë mjekësore, sipas ministrisë së Shëndetësisë dhe Mirëqenies Sociale. Mes tyre janë tetë protestues, tre efektivë policie dhe dy përfaqësues të medias. Njëri prej protestuesve ka pësuar lëndim në sy dhe po u nënshtrohet ekzaminimeve të mëtejshme.

Në Spitalin Universitar të Traumes, janë marrë ndihmë mjekësore nëntë persona, mes tyre shtatë protestues dhe dy përfaqësues të medias. Pesë kanë lënë ambientet spitalore pasi kanë marrë trajtimin e nevojshëm, ndërsa katër protestues vijojnë të jenë nën kujdesin e mjekëve për ekzaminime dhe trajtim.

Në Qendrën Spitalore Universitare “Nënë Tereza”, janë paraqitur një protestues dhe një efektiv policie. Të dy kanë marrë ndihmën e nevojshme mjekësore dhe më pas janë larguar nga spitali. Dy efektivë të tjerë policie, të cilët kanë pësuar lëndime në sy, janë trajtuar në Poliklinikën e Specialiteteve Nr. 2 në Tiranë. Edhe këta të fundit kanë lënë ambientet e poliklinikës pas marrjes së trajtimit mjekësor.

Sipas bilancit paraprak të ministrisë së Shëndetësisë, katër protestues vijojnë të marrin kujdes spitalor, ndërsa nëntë personat e tjerë janë larguar nga strukturat shëndetësore pas trajtimit.