Protestat nuk ndalën integrimin e Shqipërisë në BE
Protestat dhe tensionet politike nuk kanë ndalur integrimin e Shqipërisë në Bashkimin Evropian, sipas kancelarit gjerman Friedrich Merz dhe Komisioneres Marta Kos.
Shqipëria po përballet me një sfidë të madhe në historinë e saj moderne: shndërrimin e aspiratës evropiane në anëtarësim të plotë në Bashkimin Evropian. Kjo nuk është një rrugë që përshkohet me deklarata politike, me premtime elektorale apo me diplomaci simbolike. Është një proces i vështirë, teknik dhe institucional, që kërkon reforma të thella, përgatitje profesionale, negociata të ndërlikuara dhe rezultate të matshme.
Angazhimi i një ekipi të gjerë me rreth një mijë ekspertë shqiptarë për negociatat me BE-në është një element me rëndësi të veçantë në këtë proces. Ky numër tregon përmasën e punës që kërkohet për përafrimin e legjislacionit tonë me atë të Bashkimit Evropian, për përmbushjen e standardeve evropiane dhe për përgatitjen e administratës publike për anëtarësimin.
Protestat dhe debatet e forta politike nuk e bëjnë të pamundur integrimin evropian. Demokracitë evropiane përballen rregullisht me protesta, madje edhe të dhunshme. Ajo që ka rëndësi për procesin e anëtarësimit është mënyra se si institucionet i përballojnë këto zhvillime. Shqipëria në këto 11 ditë protesta një pjesë shumë të dhunshma, ia ka arritur të garantojë të drejtën e protestës paqësore, lirinë e shprehjes dhe të medias, si dhe sigurinë publike.