Milano në alarm për protestat, mbi 5 mijë persona në marshim

Milano është në alarm për protestat e zhvilluara në qytet, me mbi 5 mijë persona që kanë marshuar në rrugët e qytetit. Policia ka angazhuar 1,400 efektivë për të parandaluar përplasjet dhe trazirat.

Një prej marshimeve ishte organizuar kundër rritjes së kostos së jetesës, ndërsa një tjetër në mbështetje të Palestinës. Dy grupimet u bashkuan në Corso Venezia, përpara se demonstruesit të vijonin drejt zonës së Politeknikut të Milanos.

Gjatë protestave janë regjistruar edhe incidente të izoluara. Në Piazza della Repubblica, një i ri është ngjitur në një shtyllë ndriçimi dhe ka djegur një flamur të partisë Lidhja, veprim që është shoqëruar me duartrokitje nga disa prej të pranishmëve. Gjithashtu, sipas raportimeve, janë dëmtuar edhe simbole të tjera të kësaj partie, e cila po zhvillon Kongresin Federal në Milano.

Ndërkohë, polica ka kryer kontrolla ndaj disa të rinjve në zona të ndryshme të qytetit, përfshirë Largo Cairoli dhe stacionet Centrale e Cadorna. Disa prej tyre janë shoqëruar në komisariat për verifikime të mëtejshme. Sipas raportimeve të agjencisë LaPresse, mes personave të shoqëruar ka edhe të mitur, ndaj të cilëve raportohet se është zbatuar masa parandaluese e parashikuar nga dekreti i fundit i sigurisë i qeverisë italiane.

Kontrollet edhe ndaj grupeve të ekstremit të djathtë

Masat e sigurisë kanë përfshirë gjithashtu edhe grupe të ekstremit të djathtë, të cilat kishin planifikuar tubime në zona të ndryshme të Milanos. Mes tyre përmenohen Blloku Studentor, CasaPound dhe të rinj të partisë Fratelli d’Italia, ndërsa në Piazza Cavour ishte parashikuar edhe një tubim i sindikalistëve të USB-së.

Policia ka ndërhyrë për të penguar afrimin e grupeve me qëndrime të kundërta, me qëllim shmangien e përplasjeve. Në zonën pranë Duomos, një grup prej rreth 30 të rinjsh me flamuj italienë është ndaluar nga efektivët, të cilët nuk i kanë lejuar të vijojnë më tej, për të shmangur kontaktin me marshimin studentor.

Sipas raportimeve, disa prej tyre kanë brohoritur slogane në mbështetje të “remigracionit”. Gjatë bisedave me gazetarët, një prej të rinjve ka deklaruar se ishte koha për të iu përgjigjur provokimeve edhe me dhunë, ndërsa një tjetër ka shprehur pakënaqësi për incidentet dhe plaçkitjet e regjistruara gjatë javës së kaluar.

Majorino: Kërkesat e studentëve janë të drejta

Në marshimin e zhvilluar në Milano kanë marrë pjesë edhe Pierfrancesco Majorino, drejtues i Partisë Demokratike në Rajonin e Lombardisë dhe kandidat për kryetar bashkie, si dhe eurodeputetja Cecilia Strada.

Majorino deklaroi se kishte marrë pjesë në demonstratat për të dëgjuar të rinjtë dhe për të kuptuar kërkesat e tyre. Ai e cilësoi tubimin të qetë dhe theksoi se kërkesat e studentëve për të drejtën e arsimimit dhe strehimit janë plotësisht legjitime.

Ai vlerësoi gjithashtu tregtarët që i mbajtën bizneset hapur gjatë protestave, duke u shprehur se ata kontribuan në ruajtjen e një atmosferë të qetë në qytet. Pavarësisht masave të shtuara të sigurisë dhe kontrolleve, ai tha se qyteti është në një gjendje të qetë dhe se kërkesat e studentëve duhet të merren seriozisht.