Kryemadhi: Protesta duhet të ketë një Plan B për të mos lënë skenën politike vetëm PS dhe PD
Monika Kryemadhi ka deklaruar se ajo është një nga shkaktarët e protestës së të rinjve dhe se politikanët që kanë qenë pjesë e vendimit për djegjen e mandateve në vitin 2019 nuk mund të shfaqen sot si triumfatorë përballë protestës. Ajo kishte edhe një mesazh për studentët dhe të rinjtë në protestë: të mos mjaftohen vetëm me kundërshtimin, por të krijojnë përfaqësimin e tyre politik.
Kryemadhi tha se protesta duhet të ketë gati një “Plan B”, në mënyrë që nëse Edi Rama jep dorëheqjen dhe vendi shkon në zgjedhje të parakohshme, të rinjtë të kenë listën e përfaqësuesve të tyre për në Parlament dhe të mos ia lënë sërish skenën politike vetëm PS-së dhe PD-së. Ajo tha se politika është një instrument që krijon sisteme në shërbim të qytetarëve, por kur politika bie në duar të gabuara dhe ne zgjedhim parti politike dhe drejtues të partive politike të cilët shkatërrojnë demokracitë brenda partive të tyre, dhe ne presim që të ndërtojnë një demokraci jashtë partisë, atëherë kjo është utopi. Kryemadhi tha se protesta duhet të jetë e gatshme dhe e përgatitur për Planin B, duke lënë qeverinë teknike dhe duke krijuar një listë të përfaqësuesve për në Parlament në qoftë se Rama shpall zgjedhjet për 45 ditë.