Plagosja në sy e Erjon Vishkullit gjatë protestës, AMP dhe Prokuroria nisin hetimet!
Policia e Shtetit ka nisur hetimet për plagosjen e 28-vjeçarit Erjon Vishkulli gjatë protestës në Tiranë, duke uruar shërim të shpejtë atij dhe qytetarëve të lënduar. Agjencia e Mbikëqyrjes Policore dhe Prokuroria gjithashtu kanë nisur hetimet për dokumentimin e ngjarjes dhe përcaktimin e përgjegjësive. Një efektiv i "Shqiponjave" është pezulluar nga detyra përtej kalimin e kompetencave dhe mosrespektimin e parimit të proporcionalitetit.
Policia e Shtetit ka reaguar zyrtarisht pas protestës masive të studentëve dhe të rinjve të zhvilluar më 24 tetor në Tiranë. Drejtori i Përgjithshëm, Skënder Hita, ka urdhëruar nisjen e menjëhershme të hetimeve nga Drejtoria e Standardeve Profesionale për të zbardhur rrethanat në të cilat i riu pësoi dëmtimin e rëndë në sy.
Për këtë incident kanë nisur hetimet edhe Agjencia e Mbikëqyrjes Policore dhe Prokuroria, me qëllim dokumentimin e plotë ligjor të ngjarjes dhe përcaktimin e përgjegjësive. Policia e Shtetit ka shprehur keqardhjen për plagosjen e 28-vjeçarit, duke i uruar shërim të shpejtë atij, si dhe qytetarëve, gazetarëve dhe punonjësve të policisë që mbetën të lënduar gjatë protestave në kryeqytet.
Ndërkohë, një tjetër rast i denoncuar në media ka sjellë pezullimin nga detyra të një efektivi të Forcës së Posaçme “Shqiponja”. Bëhet fjalë për inspektorin A. K., i cili, sipas njoftimit të Policisë, është shfaqur duke tejkaluar kompetencat dhe duke mos respektuar parimin e proporcionalitetit gjatë ushtrimit të detyrës.
Ndaj efektivit është nisur hetim administrativ nga Drejtoria e Standardeve Profesionale. Policia e Shtetit shprehet se çdo rast i dyshuar i tejkalimit të detyrës do të hetohet me paanshmëri dhe profesionalizëm, duke pretenduar se respektimi i ligjit dhe proporcionaliteti në përdorimin e forcës janë parime të panegociueshme.