Marjana Koçeku në Kongresin e Demokratëve Europianë: Shqipëria duhet të shohë vlerat europiane

Deputetja e pavarur e Kuvendit të Shqipërisë, Marjana Koçeku, mori pjesë si e ftuar speciale në Kongresin e Partisë Demokratike Europiane, mbajtur në Athinë. Ajo u ndal për situatën politike në Shqipëri, protestat e studentëve dhe shqetësimet lidhur me respektimin e të drejtave dhe lirive themelore.

Koçeku theksoi se integrimi europian i Shqipërisë nuk duhet të lidhet me një qeveri apo drejtues të caktuar politik, por me aspiratën e qytetarëve shqiptarë për demokraci, drejtësi dhe institucione që respektojnë standardet europiane.

"Ardhma europiane e Shqipërisë nuk është një qeveri dhe nuk është një udhëheqës. Ajo është ëndrra e kahershme e një kombi dhe e një shoqërie që dëshiron të shohë vlerat europiane të realizuara në vendin e vet", deklaroi Koçeku.

Ajo falënderoi Sandro Gozin për mbështetjen dhe solidaritetin e shprehur ndaj të rinjve shqiptarë dhe protestave të tyre. Sipas Koçekut, mbështetja ndërkombëtare ka rëndësi për qytetarët që kërkojnë llogaridhëniet nga institucionet dhe forcimin e demokracisë.

Duke iu referuar Athinës si vendlindja e demokracisë, deputetja u shpreh se mbrojtja e vlerave demokratike nuk duhet të kufizohet në deklarata politike, por duhet të shoqërohet me veprime konkrete për garantimin e të drejtave dhe lirive të qytetarëve.