Serbët e veriut të Kosovës presin një të ardhme më të mirë në Serbi
Serbët e veriut të Kosovës presin një të ardhme më të mirë dhe stabilitet në Serbi, sipas tyre, pas zgjedhjeve parlamentare të parakohshme të Serbisë.
Banorët serbë të veriut të Kosovës, të cilët do të votojnë në zgjedhjet parlamentare të Serbisë të dielën, më 25 tetor, thanë se presin një të ardhme më të mirë dhe stabilitet. Njëri prej tyre, Bojani nga Mitrovica e Veriut, tha se pret që Beogradi të kujdeset për pjesëtarët e komunitetit serb në Kosovë dhe t’i mbështesë ata. “Vetëm të kalojë gjithçka pa probleme”, tha ai.
Dragana nga Mitrovica e Veriut tha se është zgjuar në orën katër të mëngjesit për të nisur me transport të organizuar drejt Rashkës për të ushtruar të drejtën e saj të votës. “Jam e lodhur, nuk e di çfarë të pres. Jeta jonë [në Kosovë] është Hiç, e çfarë pres, nuk di të të them”, shprehet ajo.
Ndërkaq, Zorani nga Leposaviqi tha se ka pritur gjatë në kufi që të mund ta ushtronte të drejtën e tij të votës, teksa shtoi se shpreson për një të ardhme më të mirë. “Shpresoj që për ne të jetë më mirë. Që në zgjedhjet e ardhshme të votoj në Leposaviq e jo këtu”, shprehet ai.
Në mesin e 6.45 milionë qytetarëve të regjistruar në listën e votuesve të Serbisë, më shumë se 115 mijë kanë adresa në Kosovë. Qytetarët serbë të Kosovës mund të votojnë në 60 vendvotime në katër komuna pranë kufirit me Kosovën: Vranjë, Rashkë, Tutin dhe Kurshumli.