Zgjedhjet në Luginën e Preshevës: Ministria e Jashtme dhe Presidentja e Kosovës thirr shqiptarët për pjesëmarrje

Ministria e Jashtme në Tiranë ka bërë thirrje shqiptarëve në Luginën e Preshevës për të dalë masivisht në votime në zgjedhjet që do të mbahen më 25 tetor. Sipas ministrit Hoxha, pjesëmarrja në zgjedhje është një e drejtë themelore demokratike dhe një mundësi e rëndësishme që përfaqësimi i Shqiptarëve të ketë peshën që meriton.

“Çdo votë ka rëndësi. Dilni dhe votoni. Për zërin tuaj, për të drejtat tuaja, për të ardhmen tuaj,” thotë ministri Hoxha.

Presidentja e Kosovës, Justina Shiroka Pula, gjithashtu ka kërkuar shfrytëzimin e të drejtës demokratike të votës për mbrojtjen dhe avancimin e të drejtave të shqiptarëve.

“Bashkimi është çelësi i përfaqësimit më të fuqishëm politik. Prandaj, bashkë në listë dhe bashkë në votim. Për më shumë deputetë shqiptarë në Parlamentin e Serbisë. Për një zë më të fuqishëm në mbrojtje të të drejtave, dinjitetit dhe interesave të shqiptarëve,” thotë presidentja Shiroka Pula.

Shqiptarët përfaqësohen nga 8 parti të mbledhura nën një sigël, me emrin Koalicioni Shqiptarë dhe me numrin 17 në listën e votimit. I vetmi deputet në parlamentin serb përpara zgjedhjeve të 25 tetorit ka qenë Shaip Kamberi, ndërsa Koalicioni Shqiptarë synon rritjen e përfaqësimit në të paktën tre ose pesë deputetë.

Kamberi ka bërë thirrje nga Ternoca për dalje masive në zgjedhje, ndërsa Ardita Sinani, kryetarja e komunës së Preshevës, e ka quajtur këtë ditë vendimtare.

Ndër objektivat kryesore janë të drejtat e shqiptarëve, përfaqësimi i tyre në institucionet shtetërore, njohja e diplomave dhe mundësitë e punësimit, përdorimi zyrtar i gjuhës shqipe dhe kundërshtimi i pasivizimit të adresave.