Manchester United humb 0-3 në shtëpi, stoli i Carrick është në dyshim

Manchester United vazhdon krizën e rezultateve dhe pëson një tjetër goditje të rëndë. “Djajtë e Kuq” u mposhtën 0-3 nga Bournemouth në “Old Trafford”, ndërsa e ardhmja e trajnerit Michael Carrick është vënë seriozisht në dyshim.

Kriza te Manchester United nuk ka fund. Skuadra angleze zhgënjeu sërish tifozët e saj, duke u mposhtur me rezultatin e pastër 0-3 nga Bournemouth, në një ndeshje ku mbrojtja u shfaq e pasigurt dhe reparti ofensiv nuk arriti të krijonte rrezik të mjaftueshëm.

Humbja e fundit e rëndon edhe më shumë situatën e Carrick në stolin e “Djajve të Kuq”. Sipas raportimeve, pozicioni i teknikut është në dyshim serioz, ndërsa Jamie Carragher ka kërkuar që drejtuesit e klubit të marrin një vendim të menjëhershëm për të ardhmen e tij.

Pjesa e parë u karakterizua nga një lojë e vakët e vendasve, të cilët u ndëshkuan në minutën e 38-të. Pas një faulli të pafavorshëm nga Heaven, Justin Kluivert ekzekutoi goditjen e dënimit, me Rayan që përfitoi nga hapësira në zonë dhe dërgoi topin në rrjetë.

Vetëm pesë minuta më vonë, Bournemouth dyfishoi shifrat. Yoro humbi ekuilibrin nën presionin e Truffert, i cili fitoi topin dhe asistoi për Tavernier. Ky i fundit nuk gaboi përballë portës, duke e çuar rezultatin në 0-2.

Goditja përfundimtare erdhi në minutën e 71-të. Evanilson përfitoi nga pasimi i Cook, shmangu portierin Lammens dhe realizoi me një goditje të bukur me parabël, duke vulosur fitoren 0-3 të miqve.

Manchester United nuk arriti të reagonte dhe krijoi shumë pak raste të rrezikshme, ndërsa Bournemouth ishte dukshëm më konkret para portës.

Pas kësaj humbjeje, diskutimet për të ardhmen e Michael Carrick janë shtuar. Jamie Carragher, gjatë analizës pas ndeshjes, deklaroi se Manchester United duhet të marrë një vendim që në mbrëmjen e kësaj disfate, duke argumentuar se largimi do të ishte në interes të klubit dhe vetë trajnerit.

Ndërkohë, në mediat angleze janë përmendur disa emra si kandidatë të mundshëm në rast të një ndryshimi në stol. Mes tyre janë Eddie Howe, Antonio Conte, Julian Nagelsmann dhe trajneri i Brighton, Fabian Hürzeler.