Lista e Studentëve fiton zgjedhjet në Serbi, Vuçiç humbet

Lista e Studentëve ka fituar zgjedhjet në Serbi, duke siguruar 138 mandate në parlament, sipas rezultateve paraprake të publikuara pas mbylljes së qendrave të votimit. Lista "Studentët po fitojnë" ka marrë 52 për qind të votave, që përkthehen në 138 mandate në parlamentin me 250 vende. Ndërkohë, lista "Aleksandar Vuçiç, Serbia e Bashkuar" ka marrë 39.3 për qind të votave, ose rreth 104 mandate.

Këto të dhëna mbështeten në rezultate të pjesshme, që përfshijnë 49.8 për qind të votave të numëruara, sipas raportimit të dhënë për 750 qendra votimi. Edhe organizata vëzhguese CRTA ka publikuar vlerësimet e saj. Sipas të dhënave që prezantoi përfaqësuesi i saj, Raša Nedeljkov, Lista Studentore ka marrë 51.47 për qind të votave, ndërsa lista e Vuçiçit ka siguruar 40.42 për qind.

Partitë e tjera që morën pjesë në zgjedhje nuk kanë arritur të kalojnë pragun zgjedhor, sipas këtyre projeksioneve, me përjashtim të disa partive që përfaqësojnë pakicat kombëtare, përfshirë atë shqiptare e cila ka siguruar një mandat.