Humbja e Vuçiç, një shans për shërimin e shoqërisë serbe

Pas fitores së Listës Studentore në zgjedhjet e parakohshme parlamentare në Serbi, Spasojeviç e cilëson rezultatin si një fitore të madhe dhe deri diku të papritur, si dhe një humbje shumë të rëndë për Partinë Përparimtare Serbe (SNS). "Ky është një shans që të fillojmë të shërohemi si shoqëri, të ndëshkojmë ata që janë përgjegjës dhe të përpikemi të jetojmë si gjithë bota normale", deklaroi për Radion Evropa e Lirë (REL) Dushan Spasojeviç, profesor në Fakultetin e Shkencave Politike në Beograd.

Spasojeviç e sheh menaxhimin e pritjeve si një ndër sfidat më të mëdha për pushtetin e ri. "Por, mendoj se do të ishte jashtëzakonisht e rëndësishme të ulim pritjet dhe të mos besojmë se që të nesërmen e ardhshme Serbia do të jetë shtet i së drejtës dhe se të gjithë ata që e meritojnë do të jenë në burg", tha ai.

Sipas Spasojeviçit, humbja e Partisë Përparimtare Serbe dhe e kandidatit të saj për kryeministër, Aleksandar Vuçiç, ishte aq e thellë sa u detyruan ta pranonin. I pyetur nëse zgjedhjet e parakohshme parlamentare u zhvilluan në një atmosferë referendumi, Spasojeviç tha se kjo mund të thuhet pa asnjë dyshim.

"Vuçiçi u përpoq të jepte fund krizës duke shpallur zgjedhje të parakohshme, por nuk ia doli. Nuk mundi ta përmbys atë prirje", tha ai.

Spasojeviç tha se SNS-ja kontrollonte gjithçka deri para dy vjetësh, kur ndodhi tragjedia në Novi Sad, ku nga shembja e strehës prej betoni të stacionit hekurudhor humbën jetën 16 persona.

"Reagimi i tyre ndaj kësaj dhe dëshira që askush prej tyre të mos mbante përgjegjësi për asgjë çuan deri këtu. Sikur ndonjë ministër kishte përfunduar në burg, sikur dikush të ishte arrestuar, nuk do të shihnim këto skena, e sigurisht jo në këto mënyrë", vlerësoi ai.

I pyetur çfarë pret nga pushteti i ri, Spasojeviç tha se pret që ai të sigurojë respektimin e ligjit dhe lirinë e mediave, si dhe të ia rikthejë autonominë universitetit.

"Besoj se edhe këto gjëra themelore do të përbënin një hap të madh përpara", shtoi ai.