Prokuroria nis hetimet për rastin e Erjon Vishkullit dhe protestuesve të tjerë të dhunuar

Prokuroria e Tiranës ka nisur hetimet për plagosjen e Erjon Vishkullit dhe protestuesve të tjerë gjatë protestave të 24 tetorit në kryeqytet. Hetimet janë kryer në bashkëpunim me Agjencinë e Mbikëqyrjes Policore dhe janë administruar rreth 20 kartela mjekësore të qytetarëve të dëmtuar.

Menjëherë pas ngjarjes, Prokuroria ka ndërmarrë veprimet e nevojshme hetimore për të zbardhur rrethanat e plagosjes së Erion Vishkullit. Në kuadër të hetimeve janë administruar pamjet filmike të vëna në dispozicion nga Banka e Shqipërisë, si dhe kartela mjekësore e të dëmtuarit pranë Spitalit Universitar të Traumës.

Gjithashtu, Prokuroria po punon për përcaktimin e mënyrës së komunikimit me autoritetet italiane, me qëllim dërgimin e një letërporosie drejtpërdrejt pranë këtyre autoriteteve. Një tjetër pjesë e rëndësishme e hetimeve lidhet me dyshimet për përdorimin e tepruar të forcës nga punonjës të Policisë shtetit gjatë protestave studentore në kryeqytet.

Deri më tani janë administruar rreth 20 kartela mjekësore të personave të dëmtuar dhe po kryhen verifikime të mëtejshme në bashkëpunim me AMP-në. Hetimet vazhdojnë për sqarimin e plotë të rrethanave të ngjarjes dhe dokumentimin e saj në përputhje me parashikimet ligjore në fuqi.