Gashi reagon për protestat: Shqipëria u përket fëmijëve të saj, jo xhepave të pushtetarëve

Reperi shqiptar me famë ndërkombëtare, Gashi, ka reaguar ashpër ndaj dhunës së denoncuar gjatë protestave të studentëve në Shqipëri, duke dalë në mbështetje të tyre dhe duke u drejtuar me një mesazh të fortë efektivëve të Policisë së Shqipërisë.

Gashi ka kujtuar atyre se para se të ishin uniformës janë qytetarët dhe prindërit, ndërsa të rinjtë që protestojnë janë pjesë e ardhmës së vendit. Ai ka vënë në pikëpyetje besnikërinë e efektivëve, duke theksuar se detyra e tyre duhet të jetë mbrojtja e qytetarëve dhe jo e interesave të pushtetit.

"Policët shqiptarë që po grenë dorë kundër të rinjve shqiptarë, të cilët po protestojnë paqështuar kundër korrupsionit dhe padrejtësisë: Turp t'ju vijë! Nga thellësia e zemrës sime, turp t'ju vijë!" shkruan Gashi në reagimin e tij.

Artisti e zhvendos mendjen tek familjet e të rinjve, duke u kërkuar efektivëve të mendonin se si do të ndiheshin nëse në vend të protestuesve do të ishin fëmijët e tyre.

"Ata janë fëmijët tanë. GJAKU YNË. E ardhmja jonë. Mund të ishin djemtë tuaj, vajzat tuaja, vëllazërit apo motrat tuaja të vogla. Imagjino të jeni prindër dhe të shihni se si pikërisht ata që janë betuar të mbrojnë fëmijën tuaj, bëhen njerëzit që e dhunojnë," vijon ai.

Në mesazhin e tij, reperi ngre gjithashtu pyetje të drejtpërdrejta mbi përgjegjësinë morale të uniformës dhe arsyet që mund t'i shtynë disa efektivë të veprojnë kundër qytetarëve.

"Sa vlen besnikëria juaj? Sa para duhen që të harroni nga vini dhe kë duhet të mbroni?" shprehet Gashi, duke shtuar se pushteti, pozicioni dhe paratë janë të përkohshme, ndërsa përgjegjësia për veprimet mbetet.

Ai kujton edhe sakrificat e brezave të mëparshëm, duke kritikuar çdo situatë ku, sipas tij, një popull përfundon duke u ngritur kundër të rinjve të vet për të mbrojtur interesat e atyre që janë në pushtet.

"Prindërit dhe gjyshërit tanë kanë sakrifikuar shumë më tepër sesa mund të imagjinojmë, që ne të kthehemi në një popull që ngrihet kundër fëmijëve të vet për rehatinë e atyre që janë në pushtet," thekson reperi në një prej pjesëve të forta të reagimit të tij.

Në fund, Gashi u bën thirrje policëve të dëgjojnë të rinjtë dhe të mos i shohin ata si armiq. Sipas artistit, ata përfaqësojnë të ardhmen e vendit dhe meritohen të mbrohen, ndërsa asnjë uniformë nuk duhet të bëhet justifikim për të harruar njerëzillëkun.

"Ju lutem, mbrojini të rinjtë tanë. Dëgjojini. Ata nuk janë armiqtë tuaj. Ata janë e ardhmja për të cilën ju duhet të luftoni.

Dhe nëse uniforma juaj ndonjëherë ju kërkon të harroni njerëzillëkun, kujtoni se para se të ishit policë, ishit shqiptarë. Ishit fëmija i dikujt. Ishit njerëz," përfundon reagimin e tij Gashi.