Ligji i ri i riparimit të mallrave: Fabrikuesit do të kenë detyrim për riparim

Ligji i ri "Për mbrojtjen e konsumatorit" do të vendosë detyrimin e tregtarëve për riparim të mallrave në Shqipëri. Kjo do të përfshijë edhe mallrat që janë prodhuar në vend, si dhe ato që janë importuar. Fabrikuesit do të kenë detyrim për të riparuar mallrat falas ose kundrejt një tarife të arsyeshme dhe brenda një kohe të arsyeshme.

Në rast se riparimi është i pamundur, fabrikuesi mund të ofrojë një mall të rinovuar. Në rast se fabrikuesi i detyruar të riparojë mallin ndodhet jashtë Bashkimit Evropian ose Republikës së Shqipërisë, detyrimi i tij duhet të përmbyshet nga përfaqësuesi i tij i autorizuar që ndodhet brenda këtij territori.

Ligji i ri do të ndalojë përdorimin e kushteve kontraktore ose teknike që pengojnë riparimin e mallrave, përveç kur këto janë përcaktuar nga faktorë legjitimë dhe objektivë, duke përfshirë mbrojtjen e të drejtave të pronësisë intelektuale, sipas legjislacionit të Bashkimit Evropian dhe atij të brendshëm.

Fabrikuesit nuk duhet të pengojnë riparuesit e pavarur të përdorin pjesë origjinale apo të përdorura këmbimi, pjesë të pajtueshme këmbimi dhe pjesë këmbimi të prodhuara me printim në 3D, kur këto pajtohen me kërkesat e legjislacionit të Bashkimit Evropian apo të brendshëm, të tilla si kërkesat për sigurinë e produktit, ose pajtohen me të drejtat e pronësisë intelektuale.

Këshilli i Ministrave do të miratojë masa inkurajuese për tregtarët dhe konsumatorët që nxisin riparimin e mallrave, përdorimin e pjesëve zëvendësuese dhe shërbimeve të riparimit, me qëllim zgjatjen e jetëgjatësisë së produkteve dhe reduktimin e mbetjeve.