Kurti hesht për Vuçiç, reagimi i tij me një fjali për humbjen e ish-presidentit serb

Humbja e Vuçiç është shoqëruar me pak koment nga Prishtina zyrtare. Në reagimin e tij të shkurtër në rrjetet sociale, Albin Kurti e përcjell largimin e Vuçiç nga pozita me një fjali. “Aleksandar Vučić ka pranuar publikisht humbjen në zgjedhje përballë Listës Studentore.” Asnjë fjalë më shumë për “subjektin” më të përdorur politikisht të Kurtit, sidomos gjatë fushatave zgjedhore, apo në prag të krizave politike në vend. Më gjatë, Kurti ndalet te Ivica Daçiç, një politikan periferik, dhe tashmë as i përfaqësuar në Kuvend, meqë partia e tij nuk kaloi pragun prej 3 për qind. “Edhe Ivica Dačić po përballet me një humbje të rëndë, me listën e tij që, sipas projeksioneve preliminare, mbetet nën pragun zgjedhor prej 3%.” Për shqiptarët e Luginës, tetë partitë e bashkuara me bekimin e tij, Kurti përcolli mesazhin e urimit, edhe pse duket se e humbi bastin për të nxjerrë nga aty 5 mandate deputetësh. Lista fitoi një kandidat më shumë. Me Listën Studentore në krye të shtetit serb, një lëvizje heterogjene pro Bashkimit Evropian, por dhe pro Rusisë, çështje si dialogu dypalësh i drejtuar nga Brukseli vihen në pikëpyetje, sidomos nëse lidhen me asociacionin e komunave me shumicë serbe, ku Kurti vazhdon të mos e zbatojë. Ndërkohë, Lista Studentore është e qartë tek çështja e njohjes: për ta nuk ka Republikë të Kosovës dhe aksioni për bllokimin e anëtarësimit të saj në organizatat ndërkombëtare do të vazhdojë.