Microsoft ofron largim vullnetar për 60 mijë punonjës

Microsoft ka nisur një program të ri për largim vullnetar nga puna, i cili u drejtohet rreth 60 mijë punonjësve në Shtetet e Bashkuara, Kanada, Indi dhe Mbretërinë e Bashkuar. Programi synon përshtatjen e fuqisë punëtore me nevojat në ndryshim të kompanisë, duke ofruar kompensim me kushte të ngjashme me ato të një largimi nga puna të iniciuar nga kompania.

Programi u drejtohet punonjësve deri në nivelin e zëvendëspresidentit, por përjashton disa kategori, përfshirë një pjesë të stafit që punon në qendrat e të dhënave, shitje dhe marketing. Punonjësit që do të pranojnë ofertën do të përfitojnë kompensim me kushte të ngjashme me ato të një largimi nga puna të iniciuar nga kompania.

Microsoft ka nisur këtë program vetëm gjashtë muaj pas zbatimit të programit të parë të këtij lloji, i cili u ofrua për rreth 8,750 punonjës në SHBA dhe u pranua nga afërsisht një e treta e atyre që plotësonin kriteret. Programi i parë ishte i kufizuar për punonjësit, mosha dhe vitet e shërbimit të të cilëve në kompani arrinin së bashku të paktën 70 vjet.

Microsoft ka vijuar ndërkohë riorganizimin e fuqisë punëtore. Në fillim të korrikut, kompania shkurtoi rreth 4,800 vende pune, ose 2.1% të stafit global, pasi gjatë vitit 2025 kishte eliminuar më shumë se 15 mijë pozicione. Sipas raportit vjetor, numri i përgjithshëm i punonjësve u ul me 5 mijë gjatë vitin e kaluar, duke shënuar rënien e parë të këtij treguesi që nga viti 2016.

Në të njëjtën kohë, gjiganti teknologjik po shton ndjeshëm investimet në inteligjencën artificiale. Vetëm gjatë tremujorit prill-qershor, Microsoft shpenzoi 41 miliardë dollarë, kryesisht për qendrat e të dhënave dhe çipat e nevojshëm për zhvillimin e kësaj teknologjie. Kompania pritet të publikojë rezultatet financiare për tremujorin korrik-shtator të mërkurën, ndërsa më herët kishte parashikuar që investimet gjatë kësaj periudhe të kalonin 50 miliardë dollarë.