Kurti kërkon hetim të menjëhershëm për vrasjen e Arlinda Zekajt

Kryeministri i Kosovës, Albin Kurti, ka kërkuar hetim të plotë dhe të menjëhershëm për vrasjen e Arlinda Zekajt në Vitomiricë të Pejës, duke theksuar se viktima kishte paralajmëruar për rrezikun ndaj jetës së saj vetëm tri ditë para se të vritej.

Duke folur në seancën e Kuvendit të Kosovës, Kurti ka deklaruar se Arlinda Zekaj nuk e mori mbrojtjen e nevojshme për ta shpëtuar jetën. "Një bashkëqytetare e jona kërkoi, por nuk e mori mbrojtjen që i duhej për të mbetur gjallë. Arlinda Zekaj u vra dje. Vrasja mizore e Arlinda Zekajt është tronditëse për të gjithë ne", ka deklaruar Kurti.

Kryeministri ka bërë të ditur se tri ditë para vrasjes, Zekaj i ishte drejtuar Prokurorisë, duke paralajmëruar për rrezikun ndaj jetës së saj. Sipas tij, këto rrethana kërkojnë zbardhjen e plotë të rastit, ndërkohë që i dyshuari për vrasjen vazhdon të jetojë në arrati.

Kurti ka kërkuar që Prokuroria dhe institucionet përgjegjëse të sqarojnë si janë trajtuar denoncimet e viktimës dhe pse paralajmërimi për rrezikun ndaj jetës së saj nuk është pasuar me masa konkrete mbrojtëse. "Çdo shkelje duhet të zbardhet", ka theksuar ai.

Në fjalën e tij para deputetëve, Kurti ka propozuar dy ndërhyrje konkrete për të parandaluar raste të ngjashme dhe për të identifikuar përgjegjësitë institucionale. Propozimi i parë parasheh që Ministria e Punëve të Brendshme, përmes strukturave kompetente të Policisë së Kosovës, të organizojë brenda 72 orëve rishikimin urgjent të rasteve aktive me rrezik të lartë.

Për secilin rast, sipas Kurtit, duhet të dokumentohen masat e sigurisë, zyrtari përgjegjës për përcjelljen e tyre, si dhe bashkërendimi me institucionet përkatëse në nivel qendror dhe lokal.

Ndërhyrja e dytë ka të bëjë me Ministrin e Drejtësisë, sipër cilës Kurti i ka kërkuar të përgatitë një raport të detajuar për rastin e Arlinda Zekajt, me qëllim që të zbardhet reagimi ose mosreagimi i zinxhirit institucional.