KLSH: Probleme të shumta në qarkullimin e Tiranës, gjysma e kamerave të trafikut jashtë funksionit

KLSH ka publikuar një raport të auditimit të qarkullimit rrugor në Tiranë, i cili tregon se sistemi i menaxhimit të qarkullimit kishte probleme serioze edhe para protestave të javës së fundit. Auditimi konstatoi se më shumë se gjysma e kamerave të monitorimit të trafikut nuk funksiononte, ndërsa 10 semaforë nuk ishin integruar në sistemin qendror. Raporti gjithashtu tregon se platforma qendrore për shfaqjen e pamjeve nuk funksiononte dhe se operatorët monitoronin kamerat individualisht në kompjuter.

Auditimi i KLSH-së evidenton gjithashtu mungesë në transportin publik, vonesa në projektet infrastrukturore dhe probleme në monitorimin e shërbimeve urbane. Raporti konstaton se shpenzimet e programit të transportit publik në Tiranë u rritën nga 325 milionë lekë në vitin 2023 në 1.53 miliardë lekë në vitin 2025, por pjesa e madhe e fondeve është përdorur për subvencione dhe rimbursime.

Raporti i KLSH-së paralajmëron se struktura e shpenzimeve, e orientuar kryesisht drejt subvencioneve, e kombinuar me realizimin e ulët të investimeve, krijon rrezik për mungesë ndikimi në përmirësimin e qarkullimit rrugor dhe cilësisë së shërbimit.