Kurti: 54 orë afat për raportin e vrasjes së Arlinda Zekajt në Pejë

Kryeministri i Kosovës, Albin Kurti këtë të martë ka bërë me dije se u ka kërkuar institucioneve përgjegjëse të japin përgjigje lidhur me rastin e vrasjes së Arlinda Zekajt në Pejë. Kurti ka theksuar se u ka lënë kohë 54 orë Ministrisë së Punëve të Brendshme dhe Ministrisë Drejtësisë për të përfunduar raportin që pritet të identifikojë dështimet e mundshme institucionale.

“54 orë nga ky moment i kanë Ministria e Punëve të Brendshme edhe Ministria e Drejtësisë, dhe kjo është rezultat që në seancën e mbrëmshme kur u votua me 67 vota rezoluta, unë thashë që ata i kanë 72 orë. Natyrisht që do të ketë edhe masa në përputhje me ligjin e me rregulloret. Ne do të bëjmë gjithçka që mundemi, e dimë, por tani shpejtësia është kryesore”, deklaroi Kurti.

Ai theksoi se raporti duhet ta zbardhë rastin deri në fund. Kurti u shpreh reforma në sistemin e drejtësisë nuk mund të shtyhet më, duke përmendur kritikat e vazhdueshme të Bashkimit Evropian ndaj Kosovës në këtë fushë.

“Reforma e sistemit të drejtësisë nuk është vetëm e rëndësishme, po është urgjente”, theksoi Kurti.

Ai kërkoi që institucionet përgjegjëse të veprojnë me shpejtësi dhe të sigurojnë llogaridhënie për çdo dështim të mundshëm.