E pabazë përfshirja e trupave izraelite në protestat në Tiranë
Protestat studentore në Shqipëri, video të pretenduara të përfaqësojnë ushtarë izraelitë, por asnjë provë për të mbështetur këtë pretendim nuk është gjetur.
Ndërsa protestat studentore vijojnë në Shqipëri, një video që po qarkullon në rrjetet sociale shqipfolëse pretendohet se tregon ushtarë izraelitë të pranishëm në Tiranë gjatë tensioneve të protestës më 17 tetor 2026. Megjithatë, për të mbështetur këtë pretendim nuk sillet asnjë provë, burim apo referencë, me përjashtim të disa “burimeve” anonime.
Me anë të motorit të kërkimit pamor Google Lens, Faktoje gjeti se pamjet e mësipërme ishin botuar fillimisht në rrjet nga gazetarja Beti Njuma, e cila, në postimin e saj nuk pretendon ndokund se personat në video janë ushtarë izraelitë. Përkundrazi, në përshkrimin që shoqëron postimin, ajo deklaron se “Edi Rama ka nxjerrë RENEAN në shesh,” duke kundërshtuar mobilizimin e kësaj njësie speciale të Policisë së Shtetit.
Në mungesën e ndonjë prove se personat në videon e mësipërme janë ushtarë izraelitë, më afër realitetit është se ata janë efektivë të Forcave Speciale RENEA. Këta të fundit, sipas raportimeve në media, u angazhuan në shtypjen e protestave studentore më 17 tetor 2026 për herë të parë. Një ditë më vonë, më 18 tetor, Policia e Shtetit pretendoi se gjatë protestës së 17 tetorit kishte rrezik për përdorim armësh zjarri, çka çoi në angazhimin e strukturave speciale RENEA për mbrojtjen e efektivëve në terren.