Ulja e pragut të detyrueshëm për TVSH, 17,5 mijë biznese të reja në skemën e tatimit

Qeveria propozon uljen e pragut të regjistrimit të detyrueshëm për TVSH-në për bizneset nga 10 në 5 milion lekë qarkullim vjetor. Kjo do të përfshijë rreth 17,516 tatimpagues të rinj në skemën e TVSH-së.

Aktualisht, bizneset me qarkullim vjetor mbi 10 milion lekë janë të detyruara të regjistrohen në skemën e TVSH-së, ndërsa ato me qarkullim mbi 5 milion lekë mund të zgjedhin regjistrimin vullnetar, sipas kushteve të percaktuara në legjislacionin në fuqi.

Ndryshimet janë propozuar në projektvendimin "Për disa ndryshime në vendimin nr. 953, datë 29.12.2014, të Këshillit të Ministrave, ‘Për dispozitat zbatuese të ligjit nr. 92/2014, “Për tatimin mbi vlerën e shtuar në Republikën e Shqipërisë”’, të ndryshuar".

Sipas relacionit, ulja e pragut synon formalizimin e mëtejshëm të ekonomisë, zgjerimin e bazës së tatueshme dhe përmirësimin e administrimit të TVSH-së.

Ulja e kufirit minimal të regjistrimit synon rritjen e formalizimit të aktivitetit ekonomik dhe krijimin e një kuadri fiskal më gjithëpërfshirës dhe transparent, nëpërmjet formalizimit të mëtejshëm të zinxhirit të transaksionit të mallrave dhe shërbimeve, si dhe zgjerimin e mëtejshëm të bazës së tatimpaguesve.

Ndërkohë, në përcaktimin e kufirit minimal të regjistrimit për TVSH-në prej 5 milion lekë, është mbajtur në konsideratë fakti se, ky kufi përjashton ato biznese që janë kryesisht biznese familjare dhe me të vetëpunësuar vetëm.

Projektvendimi parashikohet të hyjë në fuqi pas botimit në Fletoren Zyrtare, ndërsa efektet e tij do të fillojnë më 1 janar 2027.

Miratimi dhe zbatimi i këtij projektvendimi, synon të sjellë efekt pozitiv, në rreth 4.5 miliardë lekë, në të ardhurat nga TVSH-ja.