Gjykata merr vendimin për 21 persona, katër lihen në 'arrest shtëpie'

Gjykata e Tiranës ka shqyrtuar masat e sigurisë për personat e arrestuar dhe të proceduar në lidhje me protestën, duke marrë vendime për 21 persona në kuadër të dy çështjeve të vëçanta.

Në çështjen e parë, gjykata ka caktuar masën e sigurisë "arrest në shtëpi" për katër persona, ndërsa për një tjetër ka vendosur ndalimin e daljes jashtë shtetit.

Për pesë persona të tjerë është caktuar masa "detyrim për t'u paraqitur në policinë gjyqësore", ndërsa një person tjetër do t'u nënshtrohet dy masave njëkohësisht: ndalimit të daljes jashtë shtetit dhe detyrimit për të qëndruar në një vend të caktuar.

Ndërkohë, në çështjen e dytë, gjykata ka vendosur masën e detyrimit për t'u paraqitur në policinë gjyqësore për dhjetë persona nën hetim.

Këta të fundit dyshohen për përfshirje në disa vepra penale, mes të cilave shkatërrimi i pronës, goditjet për shkak të detyrës, pjesëmarrja në manifestime të paligjshme dhe pengimi i qarkullimit të mjeteve të transportit.

Në përfundim të shqyrtimit të dy çështjeve, gjykata ka urdhëruar lirimin e menjëhershëm të personave për të cilët nuk ekziston një shkak tjetër ligjor për mbajtjen e tyre.

Vendimet për masat e sigurisë mund të ankimohen pranë Gjykatës së Apelit të Juridiksionit të Përgjithshëm Tiranë, ndërsa hetimet për veprat penale të dyshuara vijojnë.