Shkëndija e Tetovës uron Harry Kane për “Topin e Artë”

Klubi shqiptar nga Maqedonia e Veriut, Shkëndija e Tetovës, ka rikujtuar përrallën e përballjes me Harry Kane në vitin 2020, duke i kushtuar një mesazh urimi sulmuesit anglez në rrjetet sociale.

Përmes një postimi në Instagram, Shkëndija ka rikthyer në vëmendje duelin historik ndaj Tottenhamit, ku përballi kishte edhe sulmuesin Harry Kane.

“Krenarë që rrugët tona u kryqëzuan me fituesin e ‘Topit të Artë’. Urime Harry Kane”, shkruan klubi tetovar në Instagram.

Shkëndija u përball me Tottenhamin më 24 shtator 2020, në raundin e tretë kualifikues të Europa League, në një ndeshje që përfundoi me fitoren 3-1 të skuadrës angleze.

Në atë takim, Kane shënoi golin e tretë për Tottenhamin, ndërsa sot aktivizohet me Bayern Munich në Bundesligën gjermane.