Sulmi në fshatin Binnari në Nigeri, 62 të vrarë

Agjencia Kombëtare e Menaxhimit të Emergjencave ka njoftuar se bilanci i viktimave nga sulmi i armatosur në fshatin Binnari, në verilindje, ka shkuar në të paktën 62 të vrarë. Sipas degës nigeriane të organizatës Amnesty International, persona të armatosur sulmuan fshatin në shtetin Taraba, duke vënë zjarrin në shtëpitë, dyqanet, rezervat ushqimore dhe motocikletat. Autoritetet paralajmërojnë se numri i viktimave mund të rritet, pasi ekipet në terren vijojnë kërkimet dhe po punojnë për të gjetur trupat të tjerë. Zëdhënësi i policisë në Taraba, Victor Mshelizah, deklaroi se operacionet e kërkimit janë ende në zhvillim dhe se çdo trup i gjetur do të përfshihet në bilancin përfundimtar të viktimave. Nigeria po përballon një krizë të sigurisë që ka filluar më shumë se 15 vjet më parë me kryengritjen e grupit të armatosur Boko Haram kundër qeverisë. Në veri të vendit, komunitetet civile janë vazhdimisht në shënjestër të grupeve të armatosura, të cilat kryejnë sulme dhe rrëmbime për shpërblim. Amnesty International ka kritikuar autoritetet nigeriane për masat e pamjaftueshme në mbrojtje të popullsisë, duke theksuar se komunitetet rurale janë lihen në meshirën e sulmeve të përsëritura. Organizata ka kërkuar një hetim të paanshëm për masakrën dhe dëmshpërblim të përshtatshëm për të mbijetuarit, duke nenvizuar se deklaratat dënuese të autoriteteve nuk mjaftojnë për të parandaluar tragjedi të tillë.