Tre cisterna me naftë ruse drejt SHBA-së, dy të sanksionuara: pikëpyetje mbi marrëveshjen Trump-Putin

Rreth 140 mijë tonë naftë ruse pritet të mbërrijë në portet amerikane nëntorin e këtij viti, në kuadrën të marrëveshjes mes Donald Trump dhe Vladimir Putin për lehtësimin e përkohshëm të sanksioneve. Dy prej anijeve janë në listat e sanksioneve ndërkombëtare, duke krijuar rreziqe ligjore për kompanitë që do të përfshihen në transportin, sigurimin dhe shkarkimin e karburantit.

Tre cisterna të ngarkuara me naftë ruse janë nisur drejt Shteteve të Bashkuara në një operacion tregtar që po vë në provë politikën e sanksioneve perëndimore ndaj Moskës. Gazeta britanike Financial Times raporton se anijet, të cilat transportojnë së bashku rreth 140 mijë tonë naftë, pritet të mbërrijnë në portet amerikane gjatë javës së parë dhe të dytë të nëntorit. Dy prej tyre ndodhen në listat e sanksioneve ndërkombëtare, ndërsa njëra është sanksionuar edhe nga vetë Uashingtoni.

Dërgesat janë të para që realizohen në kuadrën të autorizimeve të dhënë nga administrata e presidentit Donald Trump, pas marrëveshjes së tij me presidentin rus Vladimir Putin për përjashtimin e përkohshëm të naftës ruse nga disa kufizime tregtare.

Synimi i Shtëpisë së Bardhë është të frenojë rritjen e çmimeve të karburanteve në tregun amerikan, në një periudhë kur kostot e energjisë janë kthyer në shqetësim të madh ekonomik dhe politik, vetëm pak ditë para zgjedhjeve të mesmandatit të 3 nëntorit.

Sipas të dhënave të monitorimit të trafikut detar, cisterna e parë që pritet të mbërrijë në SHBA është Agioi Fanendes, në pronësi greke, e cila transporton rreth 40 mijë tonë naftë. Anija ka ngarkuar karburantin në portin rus të Primorskut më 22 tetor dhe pritet të mbërrijë në Nju Jork më 7 nëntor, katër ditë pas zgjedhjeve amerikane.

Dy ditë më vonë, më 9 nëntor, në bregdetin lindor të SHBA-së pritet të mbërrijë cisterna Talisman, një anije ruse rreth 20-vjeçare, e cila është përfshirë në listat e sanksioneve të Shteteve të Bashkuara, Britanisë së Madhe dhe Bashkimit Evropian.

Cisterna e tretë, Leruo, në pronësi të një kompanie nga Hong-Kongu dhe që lundron në flamurin e Sierra Leones, pritet të mbërrijë në bregdetin amerikan të Atlantikut më 11 nëntor. Edhe kjo anije është nën sanksionet e Bashkimit Evropian, Britanisë së Madhe dhe Kanadasë.

Pikërisht përfshirja e anijeve sanksionuara në këto operacion ka ngritur pyetje për pasojat ligjore që mund të përballojnë kompanitë amerikane dhe ndërkombëtare të angazhuara në transportin, sigurimin, financimin apo shkarkimin e ngarkesave.

Edhe pse administrata Trump ka miratuar përjashtime të përkohshme për importin e naftës ruse, këto autorizime nuk i shfuqizojnë automatikisht kufizimet e vendosura nga juridiksione të tjera. Për këtë arsye, pjesëmarrja në transaksione që përfshijnë anije të sanksionuara mund të krijojnë probleme ligjore dhe financiare për operatorët e përfshirë.

Sipas raportimit të Financial Times, shqetësimet janë ngritur edhe në Kongresin amerikan, ku ligjvënësit nga të dyja partitë kanë paralajmëruar për rreziqet që lidhen me marrëdhëniet tregtare me subjektet ruse të sanksionuara.

Marrëveshja mes Trump dhe Putin, e shpallur më 9 tetor, parashikon një rritje të ndjeshme të furnizimeve ruse me naftë për tregun amerikan dhe atë ndërkombëtar.

Sipas kushteve të bërë publike nga presidenti amerikan, Rusia është angazhuar të furnizojë menjëherë më shumë se 300 mijë tonë naftë, ekuivalente me rreth 2.25 milionë fuçi. Marrëveshja parashikon gjithashtu 500 mijë tonë të tjera gjatë nëntorit, një milion tonë në fazën pasuese dhe deri në tre milion tonë shtesë, në varësi të kapaciteteve të rafinerive ruse.

Pas njoftimit të marrëveshjes, aktiviteti i cisternave që transportojnë produkte nafte në portet ruse të Detit Baltik është rritur ndjeshëm, duke arritur nivelin më të lartë të dy viteve të fundit.

Megjithatë, mbetet e paqartë nëse Moska do të jetë në gjendje të përfundojë të gjitha sasinat e premtuara. Analistët e tregut energjetik vlerësojnë se kapacitetet prodhuese dhe furnizimi i naftës ruse janë të kufizuara.