Polonia do të ndërtojë qendër evropiane për raketat "Patriot"

Polonia do të ndërtojë një qendër evropiane për raketat "Patriot" në kuadër të një investimi të kompanisë amerikane Lockheed Martin. Qendra do të jetë e vetmja e këtij lloji jashtë Shteteve të Bashkuara dhe do të pozicionojë Poloninë si një pikë e rëndësishme për mbështetjen teknike të këtyre sistemeve në Evropë. Investimi kap vlerën e rreth 1 miliard zloty, ose 253 milion dollarë, dhe parashikohet që qendra të jetë funksionale brenda rreth 12 muajsh. Për projektin konkurruan edhe Gjermania, Holanda dhe Norvegjia. Ngritja e qendrës synon të përspejtojë mirëmbajtjen e raketave "Patriot", të cilat deri më tani duhej të dërgohen në SHBA për shërbime të caktuara teknike. Lufta në Ukrainë dhe konfliktet në Lindjen e Mesme kanë rritur kërkesën për sisteme të mbrojtjes ajrore dhe kanë ushtruar presion mbi rezervat e raketave, duke shtuar nevojën për kapacitete mirëmbajtjeje më pranë vendeve evropiane.