PS konfirmon pjesëmarrjen në konsultimet për datën e zgjedhjeve vendore

Kreu i grupit parlamentar socialist, Taulant Balla, ka konfirmuar pjesëmarrjen e partisë në konsultimet me Presidentin Bajram Begaj për përcaktimin e datës së zgjedhjeve vendore të vitit 2027. Balla ka shprehur se konsultimi me partitë politike për caktimin e datës së zgjedhjeve është një praktikë që është ndjekur edhe nga presidentët e mëparshëm.

Balla ka ironizuar partitë që refuzuan ftesën e Presidentit për të marrë pjesë në konsultimet, duke kujtuar bojkotet dhe përplasjet e mëparshme brenda opozitës. "Çdo President i Republikës ka bërë të njëjtin procedurë, duke ftuar partitë politike për konsultimin e datës së zgjedhjeve. Por sot 'depoja e molotovëve'-SHQUP qenka shprehur kundër kësaj tradite. Uroj që t'i thërrasin arsyet dhe t'i marrin pjesë në ZGJEDHJET VENDORE diku mes 15 Prill – 15 Majit 2027. Të kundërtët e kanë provuar në forma të ndryshme me bojkot, me vulë, pa vulë etj", shkroi Balla.

Gjithashtu, Balla ka konfirmuar zyrtarisht se PS do të përgjigjet pozitivisht ftesës së Presidentit. "Partia Socialiste konfirmon prezencën në konsultime me Presidentin e Republikës zotin Bajram Begaj mbi datën e zgjedhjeve vendore 2027", deklaroi Balla.

Takimi i thirrur nga Presidenti Bajram Begaj do të zhvillohet më 30 tetor, në Pallatin e Brigadave, ku përfaqësuesit e forcave politike që kanë pranuar ftesën pritet të diskutojnë datat e mundshme për mbajtjen e zgjedhjeve të ardhshme për organet e qeverisjes vendore. Konsultimet do të paraprinë dekretimin e datës së zgjedhjeve lokale të vitit 2027, në përputhje me afatet e parashikuara në legjislacionin zgjedhor.