Pronari i dyqanit italian denoncuar për mesazhet kërcënuese ndaj vjedhësve
Pronari i një dyqani në Itali është denoncuar për të kërcënuar vjedhësit me vdekje, pasi u gjetën mesazhe të tillë në rafte të dyqanit.
Një tregtar 35-vjeçar me shtetësi kineze është denoncuar në Itali për të kërcënuar vjedhësit me vdekje. Pronari i një dyqani artikujsh për shtëpinë në Pomigliano d'Arco, pranë Napolit, u denoncua nga policia bashkiake për dyshime mbi veprën penale të kërcënimit të rënduar.
Gjatë kontrollit, efektivët zbuluan disa fletë të vendosura mes rafteve, në vende të dukshme për klientët. Në to shkruhej: “Kushdo që vjedh, e gjithë familja e tij do të vritet”. Pas konstatimit të mesazheve, policia identifikoi pronarin e biznesit dhe e referoi çështjen në Prokurorinë e Nolas. Tabelat u sekuestruan si prova materiale dhe dokumentacioni i mbledhur iu përcoll autoriteteve gjyqësore për vlerësim të mëtejshëm.
Sipas raportimeve, dyshohet se tregtari mund të ketë vendosur këto mesazhe për të frenuar vjedhjet e përsëritura në dyqan. Megjithatë, motivet e tij nuk janë konfirmuar zyrtarisht. Hetimet për rastin vijojnë nga autoritetet italiane, ndërsa ndaj pronarit rëndon dyshimi për kërcënim të rënduar.