PS i jep imunitet nga arrestimi prej SPAK-ut Guvernatorit të Bankës
Komisioni i Ligjeve diskuton ndryshimet e propozuara në ligjin për Bankën e Shqipërisë, që parashikojnë garanci të posaçme ligjore për Guvernatorin, duke kufizuar mundësinë e ndalimit, privimit nga liria dhe kontrolli personal apo të banesës për vepra penale që lidhen me ushtrimin e detyrës.
Ditën e sotme në Komisionin e Ligjeve janë diskutuar ndryshimet e propozuara në ligjin për Bankën e Shqipërisë. Ato parashikojnë garanci të posaçme ligjore për Guvernatorin, duke kufizuar mundësinë e ndalimit, privimit nga liria dhe kontrolli personal apo të banesës për vepra penale që lidhen me ushtrimin e detyrës.
Socialisti Damian Gjiknuri shpreh rezerva ndaj propozimit, duke argumentuar se këto garanci shkojnë përtej atyre që u njihen zyrtarëve të tjerë të lartë të shtetit. "Po i japim guvernatori me ligj ca garanci që nuk i ka askush veç presidentit… kjo është e tepër. Ne pranojmë dëshmin e drejtësisë, garancën ta jep gjykata. Duhet të jetë në nivel kushtetues, por jo të jepet garancë që nuk e percakton norma kushtetuese. Rasti i vetëm që bëhet bypass", tha Gjiknuri.
Në përgjigje të tij, zëvendësguvernatorja Holta Zaçaj sqaroi se propozimi nuk synon të japë imunitet personal Guvernatorit, por të garantojë pavarësinë e institucionit nga ndërhyrjet e mundshme të pushteteve të tjera. "Sipas saj, në rast se kërkohet arrestimi i Guvernatorit, duhet të verifikohet nëse ekzistojnë prova të qëndrueshme dhe nëse vepra penale për të cilën kërkohet masa lidhet me ushtrimin e detyrës", tha Holta Zaçaj.
Edhe kryetari i Komisionit të Ligjeve, Ulsi Manja, ngriti pyetje për ndikimin që këto kufizime mund të kenë në punën e prokurorisë, veçanërisht gjatë mbledhjes së provave. "Po në rastet kur kontrolli i banesës dhe kontrolli personal, kufizojmë hetimin? Si do të gjejë provat prokurori?", u shpreh Manja.