Vritet personi që sulmoi një xhandar pranë Ambasadës izraelite në Beograd

Një person i mitur është vrarë pasi sulmoi një xhandar që ruante Ambasadën e Izraelit në Beograd, tha Ministria e Punëve të Brendshme e Serbisë. Sulmuesi iu vërsul xhandarit me dy thika, duke thirrur "Allahu Akbar [Zoti është i madh]", pas së cilës pjesëtari i Xhandarmërisë serbe përdori armën e zjarrit dhe e vrau.

Ngjarja ndodhi rreth 15 minuta pas mesnatës, të martën, 28 tetor. Ministri i Punëve të Brendshme i Serbisë, Ivica Dačić, e cilësoi ngjarjen si sulm terrorist dhe tha se i dyshuari më herët kishte qenë nën vëzhgimin e shërbimeve të sigurisë dhe sipas informacioneve të deritanishme, ai ishte përkrahës i grupit terrorist Shteti Islamik.

Pas incidentit, Ministria e Punëve të Brendshme e Serbisë e ngriti nivelin e kërcënimit terrorist në shkallën më të lartë, atë të kuqe. Kjo nënkupton shtimin e pranisë policore dhe të kontrolleve në lokacione kyç në mbarë Serbinë.

Arrestohet një person në Beograd lidhur me sulmin pranë Ambasadës izraelite. Autoritetet serbe nuk e kanë bërë ende publik identitetin e sulmuesit dhe as detaje të tjera lidhur me hetimet.