Kurti: Vrasja e Arlinda Zekajt ishte një vrasje e paralajmëruar dhe nuk kishte se si të përfundonte ndryshe
Kryeministri i Kosovës, Albin Kurti, ka deklaruar se vrasja e Arlinda Zekajt ishte një vrasje e paralajmëruar dhe nuk kishte se si të përfundonte ndryshe. Ai ka thënë se kjo vrasje ishte një pjesë e një "zinxhiri sistemor" i lëshimeve nga institucionet për sigurinë dhe drejtësinë.
Kryeministri i Kosovës, Albin Kurti, ka deklaruar se vrasja e Arlinda Zekajt ishte një vrasje e paralajmëruar dhe nuk kishte se si të përfundonte ndryshe. Ai ka thënë se kjo vrasje ishte një pjesë e një "zinxhiri sistemor" i lëshimeve nga institucionet për sigurinë dhe drejtësinë.
Kurti ka thënë se në rastin e Zekajt, Ministria e Drejtësisë dhe ajo e Punëve të Brendshme kanë afat deri në orën 18:00 për të paraqitur raportet e tyre të detajuara mbi evidencat dhe lëshimet në secilin zinxhir të institucioneve.
Zekaj kishte kërkuar vazhdimisht ndihmë nga institucionet. Ajo i ishte drejtuar autoriteteve duke thënë se qysh në dhjetor të vitit të kaluar, bashkëshorti i saj, prej të cilit ishte ndarë, e kishte kërcënuar me jetë. Autoritetet më vonë kishin lëshuar urdhër mbrojtjeje dhe kishin vendosur që përkohësisht kujdestaria e fëmijës së mitur të çiftit të kalonte Zekajt.
Autoritetet po ashtu kishin urdhëruar që bashkëshorti të mos i afrohej, teksa kishin vendosur se ajo mund të qëndronte në shtëpinë e përbashkët të çiftit. Dy ditë para vrasjes, Arlinda Zekaj përmes një letre i ishte ankuar kryeprokurores së Pejës për mënyrën e trajtimit të rastit të saj dhe moszbabtimit të vendimit gjyqësor.
Sipas Prokurorisë, prokurori kujdestar vlerësoi se kthimi i menjëhershëm në shtëpi mund të rrezikonte jetën. Ai e udhëzoi të qëndronte te vëllazërit dhe planifikoi që kthimi i saj në shtëpi të bëhej me shoqërim policor. Në ditën e vrasjes, Arlinda Zekaj e bëri denoncimin e fundit për dhunë në familje. Bashkëshorti i saj, prej të cilit ishte ndarë, u ndalua për 48 orë, teksa ajo këmbënguli që në përfundim të vendimit gjyqësor të kthehej në shtëpinë e përbashkët.
E pyetur nëse ndihet e sigurt në shtëpi, duke qenë se aty ndodheshin familjarët e bashkëshortit, ajo e pranoi se siguria e saj mbetej e cenuar, por këmbënguli në të drejtat e saj. Pak minuta pasi Policia e shoqëroi në shtëpi, Arlinda Zekaj dyshohet se u vra me sëpatë nga kunati i saj.