Borxhi i pashlyer, shkaku i plagosjes së 22-vjeçarit në Tiranë
Një konflikt mes dy personave në Tiranë, që përfundoi me plagosjen me armë zjarri të një 22-vjeçarit, është i lidhur me një borxh të pashlyer.
Një borxh i pashlyer dyshohet se është shkaku i konfliktit që përfundoi me plagosjen me armë zjarri të një 22-vjeçarit Elvis Zirka në rrugën "Medar Shtylla" në Tiranë. Sipas dhënave paraprake nga hetimet, konflikti mes të rinjit dhe 28-vjeçarit Sokol Zeka (Troka), i shpallur në kërkim si autor i dyshuar, kishte nisur kohë më parë dhe dyshohet se lidhet me një shumë parash që Zeka i kishte marrë borxh Zirkës, por nuk ia kishte kthyer. Gjatë deshmisë së dhënë para grupit hetimor, 22-vjeçari ka deklaruar se e njihnte prej kohësh 28-vjeçarin dhe se i kishte huazuar atij një shumë parash. Megjithatë, i plagosuri nuk ka specifikuar vlerën e borxhit dhe as arsyen për të cilën ia kishte dhënë paratë. Një tjetër pistë që po verifikohet nga hetuesit është mundësia që mosmarrëveshjet mes dy personave të kenë nisur jashtë Shqipërisë dhe më pas të kenë përkallëzuar në konfliktin me armë zjarri në kryeqytet. Kujtojmë se ngjarja ndodhi rreth orës 01:00 të mëngjesit, kur Elvis Zirka mbeti i plagosur dhe u transportua në spital, ku vijon të marrë kujdes mjekësor. Ndërkohë, Sokol Zeka (Troka) vijon të jetë në kërkim nga policia. Forcat e rendit po punojnë për lokalizimin dhe arrestimin e tij, ndërsa hetimet vazhdojnë për të sqaruar plotësisht dinamikën dhe motivin e ngjarjes.