Shqipëria do të bëhet vendi me taksat më të larta në rajon
Shqipëria do të bëhet vendi me taksat më të larta në rajon nëse miratohet paketa e re fiskale për vitin 2027. Rritja e tatimfitimit nga 15% në 17%, tatimi mbi dividendin nga 8% në 15% dhe vendosja e një shkalle të re tatimi prej 32% për pagat e larta do të thellonë diferencën me Kosovën, Maqedoninë e Veriut, Malin e Zi dhe Bosnjën e Hercegovinës.
Shqipëria pritet të bëhet vendi me tatimin më të lartë në rajon nëse miratohet paketa e re fiskale për vitin 2027. Rritja e tatimfitimit nga 15% në 17%, tatimi mbi dividendin nga 8% në 15% dhe vendosja e një shkalle të re tatimi prej 32% për pagat e larta do të thellonë diferencën me Kosovën, Maqedoninë e Veriut, Malin e Zi dhe Bosnjën e Hercegovinës.
Kosova, Maqedonia e Veriut dhe Bosnjën e Hercegovinës aplikojnë një normë standarde tatimfitimi prej 10%, ndërsa Mali i Zi nis tatimin nga 9%, duke e rritur në mënyrë progresive deri në 15%. Serbia aplikon një normë prej 15%, ndërsa Shqipëria, me propozimin e ri prej 17%, do të pozicionohej mbi të gjitha këto ekonomi.
Diferencat aktuale tatimore në rajon lidhen edhe me politikat fiskale që vendet e Ballkanit ndoqën gjatë tranzicionit ekonomik dhe vijueshmërinë e tyre. Në vitet 2000, një pjesë e ekonomive të Europës Qendrore dhe Lindore u orientuan drejt taksës së sheshtë, me synimin për të thjeshtuar sistemën fiskal, për të nxitur formalizimin dhe për të përmirësuar konkurrueshmërinë në tërheqjen e investimeve.
Shqipëria e ndoqi këtë model në gusht të vitit 2007, kur vendosi tatimin e sheshtë prej 10% mbi të ardhurat personale. Nga janari i vitit 2008, edhe tatimi mbi fitimin e korporatave u ul nga 20% në 10%. Një raport i Fondit Monetar Ndërkombëtar i vitit 2008 e lidhte reformën me synimet për përmirësimin e klimës së investimeve, rritjen e konkurrueshmërisë së ekonomisë dhe thjeshtimin e mbledhjes së taksave.
Por ky model u ndryshua në vitin 2014. Shqipëria e rriti tatimin mbi fitimin nga 10% në 15% dhe riktheu tatimin progresiv mbi pagat, me norma nga zero në 13% dhe zbatoi për herë të parë një diferencim për pagat e larta me tatim 23%. Ndryshimi e largoi vendin nga grupi i ekonomive të rajonit që vijuan të mbajnë norma më të ulëta mbi fitimin dhe të ardhurat personale.
Edhe Serbia e rriti tatimin mbi fitimin nga 10% në 15%, duke filluar nga viti 2013, në kuadër të masave të konsolidimit fiskal për të ulur deficitin buxhetor. Ndërkohë, Kosova, Maqedonia e Veriut dhe Bosnjën e Hercegovinës kanë ruajtur norma relativisht të ulëta të tatimit mbi fitimin. Mali i Zi ka kaluar në një sistem progresiv për korporatat, por me normën fillestare prej 9%.
Paketa e propozuar fiskale për vitin 2027 parashikon ndryshime në tri taksat kryesore mbi të ardhurat dhe fitimet. Norma standarde e tatimit mbi fitimin e korporatave do të rritet me 2 pika për qindje, nga 15% në 17%. Sipas përllogaritjeve në relacionet e projektligjeve, kjo masë pritet të sjellë rreth 5 miliona lekë të ardhura shtesë në buxhet.
Tatimi mbi dividendin do të rritet nga 8% në 15%, duke sjellë sipas parashikimeve të Ministrisë së Financave rreth 3 miliona lekë të tjera. Kjo do të çonte tatimin mbi dividendin në Shqipëri në të njëjtin nivel me atë të Serbisë.