Buxheti 2027: Fondi për shërbimet shëndetësore rritet pak më shumë se inflacioni

Fondi i sigurimeve shëndetësore do të arrijë në 70.3 miliona lekë, nga 69.3 miliona lekë që ishte plani i rishikuar për vitin 2026. Shtesa është vetëm 1 milion lekë dhe, nëse inflacioni realizohet sipas parashikimit të qeverisë, fuqia reale financuese e fondit do të tkurret me rreth 1.5%.

Kjo ecuri krijon presion mbi financimin e shërbimeve shëndetësore, në kushtet kur kostot e barnave, materialeve mjekësore, pajisjeve dhe shërbimeve mund të rriten, ndërsa nevojat për kujdes shëndetësor ndikohen edhe nga plakja e popullsisë.

Ndërkohë, për investimet kapitale janë planifikuar 201.5 miliona lekë, nga 176.2 miliona lekë në vitin 2026, me një shtesë prej 25.3 miliona lekësh, mbi 14%. Fondi i investimeve publike do të jetë gati tri herë më i madh se ai i sigurimeve shëndetësore.

Për çdo 1 milion lekë shtesë që planifikohet për fondin e sigurimeve shëndetësore në vitin 2027, qeveria parashikon mbi 25 miliona lekë më shumë për investimet kapitale.

Megjithatë, ndryshimi me rëndësishëm nuk lidhet vetëm me madhësinë e fondeve, por me aftësinë e institucioneve për të shpenzuar ato. Ndryshe nga projektet kapitale, që mund të shtyhen në kohë për shkak të problemave me prokurimet, projektimin apo zbatimin, shërbimet shëndetësore kanë nevojë të vazhdueshme financimi gjatë gjithë vitit. Spitalet, qendrat shëndetësore dhe skemat e rimbursimit të barnave duhet të përballojnë kërkesën për shërbime pavarësisht ecurisë së investimeve publike.

Pikërisht për këto arsye, orientimi i shtesave buxhetore krijon një debat mbi prioritetet e financimit publik, sidomos kur fondet e investimeve nuk realizohen sipas parashikimeve.

Për vitin 2027, investimet kapitale parashikohen të zënë 20.6% të shpenzimeve totale buxhetore, ndërsa fondi i sigurimeve shëndetësore vetëm 7.2%, në një kohë që Shqipëria ka nevojë akute për plotësimin e nevojave me medikamente, sidomos për neoplazmat.