Tre vëllezër milionerë dënohen me 30 vite burg për drogim dhe përdhunim në SHBA

Tre vëllezër amerikanë, Tal Alexander dhe binjakët e tij Oren dhe Alon Alexander, janë dënuar me 30 vite burg secili për drogim dhe përdhunim të dhjetëra gra në Nju Jork. Gjykatësja Valerie Caproni i ka cilësuar veprimet e tyre si "monstruoze" dhe ka kritikuar faktin që ata vazhdonin të mohonin fajësinë.

Vëllezërit, të cilët janë të njohur për pasurinë dhe aktivitetin në tregun e pronave luksoze në Nju Jork dhe Miami, kanë punuar për kompaninë e njohur Douglas Elliman dhe më pas kanë themeluar firmën e tyre, Official, në vitin 2022. Gjatë gjyqit, avokatët e tyre kanë argumentuar se marrëdhëniet ishin konsensuale, por juria nuk e ka pranuar këtë mbrojtje.

Gjatë procesit gjyqësor, 11 gra kanë deklaruar se vëllezërit u kishin ofruar dhurata dhe udhëtime në destinacione si Aspen dhe Bahamas, përpara se të kryenin sulme seksuale. Disa prej tyre kanë deklaruar se ishin të mitur në kohën kur kishin ndodhur ngjarjet.

Gjatë seancave të dënimit, 12 viktima kanë folur për pasojat psikologjike që kishin përjetuar. Disa prej tyre kanë kërkuar që tre vëllezërit të dënoheshin me burgim të përhershëm.