Gjykata e Brazilit mbyll dyert për Ervin Matën, pritet ekstradimi në Tiranë

Gjykata Supreme Federale e Brazilit ka mbyllur dyert për Ervin Matën, duke refuzuar ankimin e tij për ekstradim. Kjo do të thotë se pritet dorëzimi i tij në Shqipëri. Vendimi u morë më 20 tetor 2026, me relatorin Alexandre de Moraes. Gjykata vlerësoi se mbrojtja nuk ka paraqitur argumente të mjaftueshme për të vënë në pyetje vendimin e mëparshëm për ekstradim. Avokatët e Matës kishin ngritur disa pretendime, të lidhura me kërkesën për azil në Brazil, një hetim policor në këtë vend, si dhe me kompetencën juridikionale të autoriteteve shqiptare. Megjithatë, këto argumente nuk bindën trupin gjyqës për të rihapur çështjen. Përmbas vendimit të fundit, gjykata urdhëroi certifikimin e tij si të formes së prerë, pa pritur publikimin zyrtar. Më parë, Gjykata Supreme Federale e Brazilit kishte miratuar kërkesën e autoriteteve shqiptare për ekstradimin e Ervin Matës. Kundërshtimi i dytë i mbrojtjes ishte një tjetër përpjekje për të penguar zbatimin e këtij vendimi. Megjithatë, mbyllja e kësaj faze gjyqësore nuk do të thotë se ekstradimi do të kryhet automatikisht. Dorëzimi i Matës drejt Shqipërisë kërkon edhe vlerësimin e Presidentit të Brazilit, si dhe formalizimin nga pala shqiptare të angazhimeve të parashikuara në legjislacionin brazilian. Kështu, vendimi i 20 tetorit përbejnë një zhvillim të rëndësishëm në procesin e ekstradimit, pasi kufizon mundësinë e kundërshtimeve gjyqësore të trajtuar deri më tani. Megjithatë, koha dhe realizimi përfundimtar i dorëzimit të tij mbeten të lidhura me përfundimin e procedurave që u takojnë autoriteteve përkatësese të Brazilit. Në vitin 2023, Ervin Mata u shpall në kërkim nga SPAK si pjesë e një grupi kriminal me 11 persona, ku përfshihej edhe djali i ish-zyrtarit të policisë, Erzen Breçani. Sipas dosjes hetimore, grupi dyshohet për trafikimin e sasive të mëdha të kokainës nga Amerika Latine drejt Evropës. Në vëçanti, Mata akuzohet se koordinoi grupin për trafikimin e 250 kilogramëve kokainë, ngarkesë e nisur nga Brazili në aeroportin e Frankfurtit në Gjermani, në fund të shtatorit 2020. Ervin Mata është i njohur për drejtësinë shqiptare edhe pas përplasjes së bujshme me Ervis Martinajn, i zhdukur prej gati 4 vitesh, në një lokal në zonën e ish-Bllokut në Tiranë, në vitin 2018, ku mbeti i vrarë Fabian Gaxha, truproja ish-bosit të lojëtarëve të fatit.