Rritja e çmimeve të ushqimeve detyron gjysmën e amerikanëve të reduktojnë vaktet
Rritja e çmimeve të ushqimeve në SHBA ka çuar në reduktim të vaktëve të gjysmës së amerikanëve, sipas një sondazhi të realizuar në gusht nga kompania e shërbimeve financiare Self Financial.
Gjysma e amerikanëve deklaroi se po heqin dorë nga disa vakte ushqimore për shkak të rritjes së çmimeve të ushqimeve. Sondazhi tregoi se çmimet e produkteve ushqimore janë rritur me 28% gjatë gjashtë viteve të fundit, nga shtatori 2020 deri në shtator 2026. Për disa produkte, rritja ka qenë shumë e fortë, me çmimin e mishit të grirë të viçit që është shtrenjtuar me 67% dhe atë të kafesë me 108%. Rritja e çmimeve të ushqimeve po ndikon përtej produkteve që njerëzit vendosin në shportat e tyre të blerjeve. Sondazhi tregoi se çmimet e larta të ushqimeve kanë ndikuar në shëndetin mendor dhe nivelin e stresit më shumë sesa aktiviteti fizik, ushqyerja apo gjumi dhe pushimi. Vështirësitë financiare të amerikanëve janë një sinjal negativ për Presidentin Donald Trump dhe republikanët, në prag të zgjedhjeve të mesmandatit që do të mbahen javën e ardhshme. Disa sondazhe tregojnë se amerikanët janë gjithnjë e më pakënaqur me gjendjen e ekonomisë dhe çmimet e produkteve të përditshme, përfshirë ushqimet dhe karburantet. Sipas një sondazhi të publikuar të mërkurën nga The New York Times dhe Siena University, rreth 69% e votuesve shprehën se janë pakënaqur me koston e jetës gjatë administratës Trump, ndërsa 73% nuk miraton mënyrën se si Presidenti po menaxhon çmimet e karburanteve. Kjo pakënaqësi e përhapur ka bërë që një pjesë e votuesve të besojnë se demokratët mund të bëjnë një punë më të mirë për përmirësimin e kostos së jetës dhe në fusha të tjera të rëndësishme, sipas Don Levy, drejtor ekzekutiv i Institutit të Kërkimeve Siena.