ATA kundërshton rritjen e TVSH-së për shërbimin e akomodimit

Shoqata Shqiptare e Turizmit (ATA) kundërshton propozimin e qeverisë për rritjen e Tatimit mbi Vlerën e Shtuar (TVSH) për shërbimin e akomodimit nga 6% në 10%. ATA argumenton se masa është propozuar pa konsultim paraprak me grupet e interesit dhe pa një analizë të mirëfilltë të ndikimit. Shoqata rendit disa faktorë që, sipas saj, po ushtrojnë presion mbi sipërmarrjet e sektorit, përfshirë rënien e euros, rritjen e kostove të punës dhe shtrenjtimin e lejeve të para. Ajo pretendon se rënien e euros me 40% ka dëmtuar ndjeshëm të ardhurat nga turistët e huaj, ndërsa pagat në sektor janë dyfishuar për të mbajtur fuqinë punëtore.

ATA argumenton se norma e reduktuar e TVSH-së ka qenë një nga faktorët që kanë mbështetur zgjerimin e turizmit shqiptar. Sipas deklaratës, numri i vizitorëve është rritur nga 6 milionë në 12.6 milionë, ndërsa kontributi i sektorit ka arritur në rreth një të katërtën e Prodhimit të Brendshëm Bruto dhe në 44% të eksporteve.

Shoqata rikujton se ulja e TVSH-së në 6% erdhi pas një procesi advokimi me institucionet dhe u mbështet nga rekomandimet e një grupi ekspertësh të Universitetit të Harvardit, të cilët, në bashkëpunim me ATA-n, hartuan një raport për ringritjen e sektorit.

Në përfundim, Shoqata Shqiptare e Turizmit i kërkon qeverisë të pezullojë projektvendimin për rritjen e TVSH-së, të nisë konsultimet me grupet e interesit dhe të përqendrojë përpjekjet në luftën kundër informalitetit. "Zgjidhja nuk është taksimi i biznesit formal, por formalizimi i tregut", thekson ATA, duke paralajmëruar se rritja e taksës mund të dëmtojë konkurrueshmërinë e turizmit shqiptar në tregun rajonal.