Senati francez miraton gjoba deri në 10 mijë euro për dëmet e shkaktuara nga protestuesit

Senati francez ka miratuar një projektligj që parashikon detyrimin e protestuesve për të paguar deri në 10 mijë euro për dëmet e shkaktuara gjatë demonstratave. Projektligji u miratua me 229 vota pro dhe 105 kundër, falë mbështetjes së aleancës së partive të djathta dhe të qendrës, të cilat kanë shumicën në Senat.

Legjislacioni duhet të shqyrtohet dhe të miratohet edhe nga Asambleja Kombëtare franceze, ku forcat politike janë më të përçara, përpara se të mund të hyjë në fuqi. Nisma u propozua fillimisht pas trazirave që shpërthyen në maj, pas fitores së Paris Saint-Germain ndaj Arsenalit në finalen e Ligës së Kampionëve. Megjithatë, ajo mori një rendësi të re pas protestave të 17 tetorit kundër pabarazisë ekonomike dhe rritjes së çmimeve, të cilat u shoqëruan me përplasje të dhunshme, dëmtime pronash dhe grabitje biznesesh.

Projektligji parashikon që përgjegjësia financiare të mos kufizohet domosdoshmërisht vetëm te personat që kanë shkaktuar drejtpërdrejt dëme. Edhe individët që provohet se kanë marrë pjesë me vëddeje në grupe të krijuara për të kryer akte vandalizmi mund të detyrohen të paguajnë dëmshpërblime.

Një tjetër dispozitë e debatueshme parashikon mundësinë e sekuestrimit të përfitimeve sociale dhe ndihmës për të mbuluar dëmet e shkaktuara. Kjo masë ka shkaktuar kundërshtime nga deputetët e majtë dhe organizatat e të drejtave të njeriut.

Amnesty International paralajmëroi se dispozitat e propozuara mund të shtynë familjet tashmë të margjinalizuara drejt varfërie edhe më të thellë. Franca nuk është i vetmi vend evropian që po ndërmerr masa më të ashpra ndaj dhunës në protesta. Edhe Italia ka miratuar dispozita të reja sigurie, që parashikojnë dënimet nga 4 deri në 12 vite burg për organizimin e grupeve të përfshira në demonstrata të dhunshme.