Britania nxjerr në det 3 nga 4 nëndetëset e saj bërthamore

Britania e Madhe ka dislokuar tre nga katër nëndetëset e saj bërthamore në oqean, një lëvizje e pazakontë që ka tërhequr vëmendjen e ekspertëve ushtarakë. Sipas gazetës britanike The Times, burime nga Marina Mbretërore kanë shprehur habi për këtë dislokim, pasi në kushte normale Britania mban në det dy nëndetëse: njëra të armatosur me kokë bërthamore dhe tjetra për stërvitje.

Nga tre nëndetëset që ndodhen aktualisht në lundrim, të paktën njëra mbart raketa bërthamore Trident, pjesë e sistemit strategjik të mbrojtjes së Mbretërisë së Bashkuar. Ekspertët ushtarakë theksojnë se ky dislokim nuk duhet interpretuar domosdoshmërisht si një sinjal kërcënues apo paralajmërim ndaj Rusisë. Megjithatë, lëvizja vjen në një periudhë kur autoritetet britanike kanë shtuar paralajmërimet për rreziqet e sigurisë.

Vetëm javën e kaluar, ministri britanik i Mbrojtjes u bëri thirrje qytetarëve të siguronin rezerva emergjence për t'u përbashkëtuar me situata katastrofike, përfshirë sulme kibernetike apo akte terroriste të frymëzuara nga fuqi armiqësore. Ndërkohë, shefi i Shtabit të Përgjithshëm, gjatë një fjalimi para ushtarakëve, u kërkoi atyre të qëndronin të përgatitur për mundësinë e një lufte.

Po javën e kaluar, forcat ajrore britanike dhe franceze zhvilluan një stërvitje të përbashkët, gjatë së cilës simuluan një sulm bërthamor kundër një vendi armik. Britania e Madhe mban vazhdimisht të paktën një nëndetëse të armatosur me raketa bërthamore në det. Kjo strategji synon të garantojë aftësinë e vendit për t'u kundërpërgjigjur një sulmi bërthamor, edhe në rast se territori britanik dhe qendrat e tij të komandimit pësoshin shkatërrime të mëdha.

Ndryshe nga Rusia, e cila zotëron edhe armë bërthamore taktike, forca britanike e parandalimit bërthamor mbështetet tërësisht të nëndetëset dhe armët strategjike që ata mbartin. Flota nënujore britanike përbëhet nga nëntë nëndetëse. Pesë i përkasin klases Astute, të pajisura me raketa lundruese dhe silurë konvencionale, ndërsa katër të tjerat janë të klases Vanguard, të cilat mbartin raketa bërthamore.

Detyra e nëndetëseve Vanguard është të qëndrojnë të fshehura në thellësi të oqeaneve, jashtë mundësisë së zbulimit nga kundërshtaret, duke ruajtur aftësinë e Britanisë për të ndërmarrë një kundërpërgjigje bërthamore në rrethana ekstreme. Dislokimi i njëkohshëm i tre prej këtyre katër nëndetëseve përbeh një zhvillim të pazakontë për Marinën Mbretërore, megjithëse deri tani nuk ka një konfirmim se ai lidhet me ndonjë kërcënim konkret apo ndryshim të strategjisë bërthamore britanike.