Përmbysje spektakolare e Elbasanit ndaj Partizanit, “paqe” në Skënderbeu-Laçi
Elbasani ka realizuar një përmbyshje spektakolare 2-1 ndaj Partizanit në ndeshjen e javës së nëntë të Superiore, duke ngjitur verdheblutë në kuotën e 11 pikëve. Partizani, në këtë mënyrë, thellon krizën në fund të renditjes me katër pikë.
Në ndeshjen e vlefshme për javën e nëntë të Superiore, Elbasani ka realizuar një përmbysje spektakolare 2-1 ndaj Partizanit. Të kuqtë e kryeqytetit filluan sfidën me ritmin e duhur dhe kaluan në avantazh falë një goli në debutim nga Jovicic. Pjesa e parë u mbyll me këtë eperërsi minimale për miqët, por fraksioni i dytë solli një histori tjetër në fushë. Elbasani u hodh në sulm dhe barazoi shifrat në minutën e 82-të me anë të Mazarit. Vetëm gjashtë minuta më vonë, Nikaj dërgoi topin në rrjetë duke kompletuar përmbysjen e madhe.
Goli i avantazhit u rishikua gjatë në sistemin VAR përpara se arbitri ta pranonte përfundimisht si të rregullt. Ky sukses i ngjit verdheblutë në kuotën e 11 pikëve, ndërsa Partizani thellon krizën në fund të renditjes me katër pikë.
Në takimin tjetër, Skënderbeu dhe Laçi ndanë nga një pikë pas barazimit 1-1 në Korçë. Juglindorët e mbyllën pjesën e parë në avantazh, pas golit të shënuar nga Lagonydis. Për kurbinasit, Traore barazoi në minutën e 66-të. Skënderbeu mbajti vendin e tetë me 10 pikë, ndërsa Laçi me një pikë më shumë mbajti vendin e pestë.