"Klodianna Lala: Rama duhet të kishte dhënë dorëheqjen pas skandalit të SHISH"

Gazetarja Klodiana Lala ka deklaruar se përgjegjësia politike për çështjen e Vlora Hysenit rëndon mbi kryeministrin Edi Rama, të cilin e ka kritikuar për emërimin e Hysenit në krye të SHISH-it. Ajo ka thënë se hetimi duhet të sqarojë edhe mënyrën se si ka funksionuar institucioni që ka për detyrë garantimin e sigurisë kombëtare.

"Lëshimi i Vlora Hysenit në liri është një çështje e rëndësishme që ka nevojë për një hetim të thelluar, është një dështim i të gjitha institucioneve. Së pari, dështimi i zotit Rama që solli një njeri të pacertifikuar në krye të SHISH. Së dyti, për të kuptuar në çfarë gjendje është ky institucion që duhet të garantonte sigurinë kombëtare, mendojë se është çështje që do të tregojë shumë gjë për mënyrën se si ka funksionuar shteti shqiptar", tha Lala për "News 24".

Gazetarja u ndal gjithashtu të dyshonte për nxjerrjen e informacioneve sekrete dhe ndihmën e pretenduar ndaj një personi të kërkuar, të dyshuar për përfshirje në krimin e organizuar. Ajo theksoi se, sipas interpretimit të saj për pretendimet e SPAK-ut, bëhet fjalë për akuza që ngrenë shqetësimet serioze për sigurinë kombëtare.

Lala vlerësoi se zhvillimet e përmbledhura prej saj duhej të kishin sjellë përgjegjësi politike, deri në dorëheqjen e kryeministrit.

"Arrestimi i shefes së SHISH, pavarësisht se është në 'arrest shtëpie', do të duhej të kishte sjellë dorëheqjen e kryeministrit të vendit. Pavarësisht faktit se zonja Balluku dyshohet për korrupsion, rasti i ish-shefes së Shërbimit Informativ Shtetëror, ka dyshime se ka nxjerrë informacion sekret, ka ndihmuar një person të krimit të organizuar në arrati dhe është ende në funksion, sipas pretendimeve të SPAK, të një personi që është i dyshuar për krim të organizuar", deklaroi gazetarja.

Sipas gazetares, hetimi i kësaj çështjeje duhet të shkojë përtej përgjegjësive individuale, për të sqaruar mënyrën e funksionimit të institucioneve të sigurisë dhe mekanizmat e kontrollit brenda tyre.