Veliaj: Në izolim në Fier, pa ujë dhe pa kujdes mjekësor

Kryebashkiaku i Tiranës, Erion Veliaj, ka ngritur akuza të forta për kushtet e mbajtjes së tij në burgun e Fierit, vetëm disa orë pas transferimit nga Durrësi. Në një letër të publikuar nga avokati Plarent Ndreca, ai pretendon se është vendosur në izolim për 10 ditë, pa kushte të përshtatshme dhe pa mundësi komunikimi me familjen.

Veliaj pretendon se është vendosur në një ambient pa dritare dhe pa kushte të përshtatshme, ndërsa i është mohuar kujdesi mjekësor dhe komunikimi me familjarët e mbrojtësin ligjor. Ai deklaron se ndodhet në të njëjtin korridor me tre persona të dënuar me burgim të përgjithëshëm për vrasje, duke ngritur pyetje mbi kriteret e përdorura për vendosjen e tij në këtë sektor.

Avokati Plarent Ndreca ka ngritur gjithashtu shqetësimet për gjendjen shëndetësore të Veliajit. Sipas tij, kryebashkiaku ka më shumë se tri javë që vuan nga probleme me këmbët dhe ka kërkuar të ekzaminohet nga personeli mjekësor, por kjo kërkesë nuk është përbushur.

Ndreca deklaroi se Veliaj nuk është ushqyer pas transferimit, duke e lidhur këtë situatë me dyshimet dhe pasigurinë e tij për mënyrën se si është organizuar zhvendosja nga Durrësi në Fier. Nga informacionet e dhënë nuk është sqaruar nëse bëhet fjalë për refuzimin e ushqimit nga vetë Veliaj apo për pengimin e aksesit në ushqim nga institucioni.

Në orët e mbrëmjes, në burgun e Fierit ka shkuar edhe Avokati i Popullit, Endrit Shabani, i cili është takuar me Veliajn për të verifikuar rrethanat e transferimit dhe kushtet e trajtimit të tij. Transferimi në Fier ka ndodhur një ditë pasi kryebashkiaku komentoi nga qelia zhvillimet politike në Serbi dhe atë që ai e cilësoi si fitore të lëvizjes studentore. Në reagimin e tij, Veliaj përdori tone kritike ndaj drejtimit politik në Beograd, duke iu referuar “makiavelistit dhe populistit të Beogradit”.