Universitetet shpenzuan 103 milionë euro, por shpenzimet për kërkimin shkencor janë pak më shumë se 4% të këtij totali

Universitetet shqiptare kanë shpenzuar 103 milionë euro gjatë një viti akademik, por vetëm 4.2 milionë euro janë shpenzuar për kërkimin shkencor. Kjo shifër është pak më shumë se 4% e totalit të shpenzimeve të universiteteve. Universiteti i Tiranës dhe Politekniku kanë shpenzuar vetëm 1.02 milionë euro dhe 756 mijë euro për kërkimin shkencor, ndërsa një pjesë e parave janë shpenzuar për rikonstruksion, mobilim dhe siguri fizike.

Rigels Xhemollari, Qëndresa Qytetare, ka thënë se "Fondi i kërkimit shkencor nuk e 4 % që do të thotë se japim më shumë para për letra dhe printera se sa u japim pedagogëve për kërkim shkencor". Ai ka shtuar se "Në privat ka laboratorë, në publik restaurohet një sallë 3 herë vetëm për të vjedhur fonde, pra këta nuk e kanë seriozisht".

Aleko Miho, pedagog, ka thënë se "Për herë të parë, vetë qeveria deklaroi dyfishimin e fondeve për kërkimin shkencor, nga 758 milionë lekë në vitin 2023 në 1.5 miliardë lekë për vitin 2024. Megjithatë, fondet për shkencën vazhdojnë të mbeten gati 10 herë më të ulëta se mesatarja e vendeve të Bashkimit Europian".

Taulant Muka, kërkues shkencor, ka thënë se "Pse nuk marrin fonde europiane universitete shqiptare, ndonëse kanë akses në fonde miliona euro? Shikoni Serbinë, vetëm universiteti i Bioteknologjisë që po ndërtojnë kushton 500 milionë euro nga BE. Fondet që kanë marrë universitetet nga BE është 400 mijë euro sa paga e një drejtori epidemiologji në Zvicër".

Në kontrast të fortë me nevojat dhe motivet e revoltave studentore, përkundër fondeve me pikatore për kërkimin shkencor, një pjesë e konsiderueshme e parave të universiteteve shkojnë për rikonstruksion, mobilim, siguri fizike etj. Universiteti Politeknik shpenzoi rreth 4.1 milionë euro për investime e të lidhura me ndërtimet dhe rikonstruksionet, Universiteti i Tiranës rreth 3.6 milionë euro, Universiteti i Durrësit rreth 3.5 milionë euro për mobilimin e një ndërtese, ndërsa Universiteti i Mjekësisë mbi 2.1 milionë euro për rikonstruksionin e godinës së Farmacisë.