Vuçiç po përgatiste grusht shteti për të mos lëshuar pushtetin

Gazeta britanike "The Times" ka publikuar pretendimet se ish-Presidenti serb Aleksandar Vuçiç ka shqyrtuar mundësinë e përdorimit të forcës për të mos pranuar humbjen në zgjedhjet parlamentare. Sipas gazetës, Vuçiç ishte përfshirë në një skenar që mund të përfshinte dhunën dhe destabilizimin nëse rezultati i zgjedhjeve do të ishte i ngushtë.

Spasoje Vuleviç, ish-komandant i Njësisë Speciale Kundër Terrorizmit në Serbi, pretendon se në qendër të Beogradit ishin vendosur mijëra policë dhe persona të lidhur me pushtetin për të mbrojtur regjimin në një moment të rëndësishëm politik.

"Jam 100% i sigurt se ai kishte planifikuar të mos i njihte rezultatet", deklaroi Vuleviç për "The Times".

Eurodeputeti Sandro Gozi, drejtues i Partisë Demokratike Europiane, ka deklaruar se gjatë ditës së zgjedhjeve kishte marrë informacione shqetësuese nga burime diplomatike për një përpjekje të mundshme të Vuçiçit për të kundërshtuar rezultatin me forca.

Ndërkohë, Radomir Saiçiç, kandidati i Listës Studentore, pretendon se ekzistonte një plan për përdorimin e dhunës në rast se rezultati do të ishte i ngushtë. Sipas tij, ndërhyrja përmes telefonatave nga persona të lidhur me policinë dhe institucione të tjera mund të ketë ndikuar në ndryshimin e qëndrimit të presidentit serb.

Gjatë ditës së zgjedhjeve, grupe burrash të veshur me të zeza u panë duke lëvizur drejt parkut Pionirski në Beograd, ndërsa forcat e xhandarmërisë u pozicionuan në zonë dhe disa rrugë u bllokuan. Këto zhvillime ngritën dyshime për atë që mund të ishte duke u përgatitur në prapaskenë.

Avokati Rade Gjurçiç, i lidhur me Shoqatën e Pavarur të Gazetarëve të Serbisë, ngriti mundësinë e një skenari për të pretenduar parregullsi zgjedhore, për të kërkuar përsëritjen e votimit dhe për të nxitur protesta që do të shërbenin si justifikim për anulimin e rezultatit.

Megjithatë, rreth orës 21:30, afërsisht një orë pas mbylljes së qendrave të votimit, Vuçiç pranoi humbjen. Sipas "The Times", pas këtij zhvillimi edhe grupeve të burrave të mbledhur në qendër të Beogradit u larguan.

Presioni evropian mund të ketë ndryshuar vendimin e Vuçiçit. Burimet e cituara nga gazeta britanike sugjerojnë se presioni diplomatik nga Europa mund të ketë luajtur rol në tërheqjen e Vuçiçit nga një përpjekje e mundshme për të kundërshtuar rezultatin zgjedhor. Në Beograd kanë qarkulluar gjithashtu pretendime të pakonfirmuara për një ndërhyrje të mundshme të Viktor Orbánit, por pa prova të pavarura që të vërtetojnë rolin e tij.

Zëdhënësja e presidentit serb ka hedhur poshtë pretendimet se vendosja e forcave të policisë lidhej me një plan për marrjen ose mbajtjen e pushtetit me forca. Sipas saj, masat e sigurisë kishin për qëllim parandalimin e dhunës nga protestuesit.

Deri tani, nuk ka konfirmim të pavarur për ekzistencën e një plani të organizuar për përdorimin e forcës, identitetin e personave që pretendohet se kanë telefonuar Vuçiçin apo përmesbajtjen e bisedave të tyre.