Aksidenti i rëndë hekurudhor në Spanjë: Regjistrimet audio hedhin dritë mbi minutat para përplasjes

KONTINENTI: Aksidenti i rëndë hekurudhor në Spanjë, në të cilin vdiqën 68 persona dhe u plagosën dhjetëra të tjerë, është shkaktuar pas një serie të pashpjegueshme të komunikimeve mes makinistëve dhe qendrës së kontrollit hekurudhor. Regjistrimet audio të publikuara nga mediat spanjolle tregojnë se treni i kompanisë private Iryo kishte humbur komunikimin me sistemin e kontrollit të trenit dhe se mjeti kishte mbetur i ndaluar në Urda, ndërsa treni i kompanisë shtetërore Renfe po afrohej me shpejtësi të lartë.

Në një regjistrim, makinisti i trenit Iryo njofton qendrën e kontrollit se kishte humbur komunikimin me sistemin e kontrollit të trenit dhe se mjeti kishte mbetur i ndaluar në Urda. Pas disa komunikimeve, makinistit i kërkohet të rifillojë udhëtimin, por ai njofton sërish se nuk mund ta vinte trenin në lëvizje, pasi sistemi i sigurisë nuk i lejonte të kontrollonte funksionet e tij.

Ministri spanjoll i Transportit, Oscar Puente, e cilësoi “të pashpjegueshme” vendimin për t’i udhëzuar trenat të vijonin lëvizjen pa kufizime shpejtësie. Kryeministri Pedro Sanchez deklaroi se “e gjithë Spanja është në zi”, duke shprehur ngushëllimet për viktimat dhe familjet e tyre.

Ekipet e emergjencës kanë punuar gjatë gjithë natës në vendngjarje, duke përdorur pajisje të posaçme për të prerë vagonët e dëmtuar dhe për të nxjerrë viktimat. Sipas Ministrisë së Brendshme spanjolle, në operacion janë angazhuar qindra efektivë, ndërsa për kërkimet janë përdorur edhe dronë dhe helikopterë. Spanja ka shpallur tri ditë zie kombëtare për një nga aksidentet më të rënda hekurudhore në historinë moderne të Evropës. Hetimet vijojnë për të përcaktuar shkaqet e tragjedisë dhe përgjegjësitë e mundshme.