48 punonjësë humbën jetën në vitin 2025 për shkak të aksidenteve në punë

Siguria në vendin e punës vijon të mbetet një problem shqetësues në Shqipëri. Gjatë vitit 2025, 48 punonjësë humbën jetën si pasojë e aksidenteve në punë, 15 më shumë se një vit më parë, ndërsa rritja ka shënuar edhe numri i përgjithshëm i të aksidentuarve. Sipas të dhënave të publikuara nga Instituti i Statistikave (INSTAT), numri i viktimave u rrit me 45,5% krahasuar me vitin 2024, kur ishin regjistruar 33 humbje jete. Mesatarisht, katër punonjësë kanë humbur jetën çdo muaj si pasojë e aksidenteve në punë gjatë vitit të kaluar. Rritja nuk është kufizuar vetëm te rastet me pasoja fatale. Në vitin 2025 u regjistruan gjithsej 212 punëmarrës të aksidentuar, 19,8% më shumë krahasuar me vitin 2024. Bazuar në këtë ndryshim, një vit më parë numri i të aksidentuarve ishte rreth 177. Paralelisht është shtuar edhe numri i inspektimeve të kryera për shkak të aksidenteve në punë. Sipas INSTAT, gjatë vitit 2025 u realizuan 275 inspektime, duke shënuar një rritje prej 22,8% krahasuar me vitin paraardhes. Sakaq, të dhënat e Inspektoratit Shtetëror të Punës për vitin 2025 tregojnë se sektori i ndërtimit vijon të jetë ndër aktivitetet ekonomike me rrezikun më të lartë për punonjësit. Sipas raportit vjetor të institucionit, gjatë vitit 2025 në ndërtim u regjistruan 48 punëmarrës të aksidentuar, nga të cilët 18 raste me pasoja fatale. Në vitin 2024, në të njëjtin sektor ishin regjistruar 37 punonjës të aksidentuar, prej të cilëve 11 kishin humbur jetën. Sipas analizës së Inspektoratit, aksidentet fatale në këtë sektor lidhen kryesisht me rëniet nga lartësia, rënien e objekteve dhe mungesën në zbatimin e masave mbrojtëse. Ndërkohe, në shpërndarjen e aksidenteve pa pasoja fatale sipas sektorëve, ndërtimi zë 22,6%, prodhimi 20,7% dhe sektori minerar 14,6%. Kategoria e aktivitetëve të tjera përmban 29,5% të rasteve, ku përfshihen edhe aksidente rrugore të ndodhura gjatë punës.