Universiteti i Shkodrës në krizë morale, kush e mbron Adrian Lekën pas skandalit të 22 mijë eurove?

Enea Karakaçi duhet të kërkojë rektorit të Universitetit të Shkodrës, Blerta Dragusha, dhe kryetarit të Bashkisë Shkodër, Benet Beci, të ndërmarrin masa urgjente për largimin e Adrian Lekës nga Bordi i Administrimit të universitetit, pas skandalit të fundit të denoncuar nga emisioni investigativ "Fiks Fare". Sipas denoncimit televiziv, Adrian Leka dyshohet se i ka marrë një qytetare 22 mijë euro për shitjen e një apartamenti, të cilin pretendohet se e kishte shitur disa herë. Këto pretendime kërkojnë verifikim nga organet kompetente, por publikimi i tyre e bën të domosdoshëm një reagim institucional, veçanërisht për shkak të funksioneve që Leka ushtron në Universitetin e Shkodrës. Adrian Leka nuk është vetëm avokat, por edhe pedagog në këtë universitet. Ai ka qenë gjithashtu kandidat për anëtar të Këshillit të Lartë Gjyqësor. Për këto arsye, çështja nuk mund të trajtohet thjesht si një problem i reputacionit personal. Ajo prek edhe besueshmërinë e institucioneve ku ai ushtron funksione dhe përgjegjësi. Skandali vjen në një periudhë kur universiteti përballet me polemika të përsëritura për ligjshmërinë e vendimmarrjes dhe funksionimin e organeve drejtuese. Rivotimi i fundit i Lekës në Bordin e Administrimit, për të cilin janë ngritur pretendime për paligjshmëri, kërkon transparencë dhe verifikim të plotë të procedurës. Rektorja Blerta Dragusha dhe kryetari i Bashkisë, Benet Beci, duhet të sqarojë rolin e tyre në këtë proces dhe bazën ligjore mbi të cilën u mbeshtet rivotimi. Ndërkohë, Ministria e Arsimit, e drejtuar nga Mirela Kumbaro, duhet të shqyrtojë çështjen brenda kompetencave të saj dhe të kërkojë përgjegjësi nëse konstaton shkelje. Edhe Senati Akademik duhet të rimblidhet urgjentisht për të shqyrtuar pasojat institucionale të këtij rasti dhe masat që lejon ligji. Ky organ, i cili vetëm pak ditë më parë i dha sërish besimin Lekës, ka përgjegjësinë të vlerësojë nëse vendimet dhe procedurat e ndjekura përbushin me ligjin dhe interesin e universitetit. Adrian Leka është përfshirë edhe më parë në polemika lidhur me vendimmarrjen e Bordit të Administrimit. Një prej tyre lidhet me administratorin Mark Molla, për të cilin, Leka fillimisht votoi kundër kandidaturës dhe më pas, në cilësinë e kryetarit të Bordit, votoi për shtyrjen e moshës së tij të pensionit. Ky episod kërkon sqarim mbi arsyet dhe bazën ligjore të ndryshimit të qëndrimit. Universiteti i Shkodrës “Luigj Gurakuqi” nuk mund të mbrojë reputacionin e vet duke heshtur përballë denoncimeve që përfshijnë drejtuesit e tij. Institucionet përgjegjëse duhet të verifikojnë faktet, të sqarojnë ligjshmërinë e vendimeve dhe të marrin masat përkatës, pa mbrojtje politike dhe pa standarde të dyfishta. Nëse Enea Karakaçi, Blerta Dragusha dhe Benet Beci kërkojnë të deshmojnë se përgjegjësia institucionale vlen edhe për njerëzit që kanë mbështetur, ky është momenti për të vepruar. Nëse verifikimet provojnë shkelje, largimi nga funksioni duhet të ndjekë procedurën ligjore. Heshtja, ndërkohë, vetëm sa shton pyetjet mbi mënyrën se si drejtohet universiteti dhe mbi kriteret që përcaktojnë përfaqësimin e tij në organet e administrimit.