Projektbuxheti 2027: Pensionet do të indeksohen në prill dhe bonusi për pensionistët do të dyfishohet

Ministri i Financave, Petrit Malaj, ka prezantuar projektbuxhetin për vitin 2027, duke njoftuar indeksimin e pensioneve në prill dhe dyfishimin e bonusit për pensionistët. Për këtë fund, është parashikuar një fond prej 20 miliardë lekësh.

Gjatë prezantimit të projektbuxhetit dhe paketës së re fiskale në mbledhjen e Konferencës së Kryetarëve, ministri Malaj bëri të ditur se mbështetja për pensionistët është një nga masat e parashikuara për vitin e ardhshëm.

Sipas tij, pensionet do të indeksohen në prill të vitit 2027, ndërsa bonusi për pensionistët do të dyfishohet. Për financimin e këtij bonusi, në projektbuxhet është parashikuar një fond prej 20 miliardë lekësh.

Ministri njoftoi gjithashtu ndryshime në mbështetjen financiare për familjet me fëmijë. Bonusi i bebeve pritet të rritet në mënyrë progresive për fëmijët deri në moshën pesëvjeçare.

Sa i përket treguesve financiarë, shpenzimet e përgjithshme të parashikuara në projektbuxhetin e vitit 2027 tejkalojnë 10 miliardë euro, ndërsa të ardhurat buxhetore llogariten në 907.9 miliardë lekë, ose 30.9% të Prodhimit të Brendshëm Bruto.

Sipas Malajt, të ardhurat pritet të jenë rreth 56 miliardë lekë më të larta krahasuar me vitin 2026.

“Shqipëria po financon zhvillimin pa rrezikuar stabilitetin”, deklaroi ministri i Financave.

Projektbuxheti parashikon edhe fonde shtesë për arsimin, përfshirë 1.1 miliardë lekë për bursat e studentëve nga familjet në nevojë, 400 milionë lekë për infrastrukturën e arsimit bazë, 500 milionë lekë për programet pas orarit shkollor dhe 100 milionë lekë për kërkimin shkencor.