U kap me 21 emigrantë të paligjshëm, arrestohet 35-vjeçari në Sarandë

Një 35-vjeçar u arrestua në Sarandë për transportimin e 21 emigrantëve të paligjshëm nga Iraku dhe Irani. Ai u kap gjatë operacionit policor "Tranzit 2" në afërsi të fshatit Shkallë.

Sipas Policisë, emigrantët dyshohet se kishin kaluar ilegalisht kufirin tokësor nga Greqia drejt Shqipërisë, ndërsa destinacioni i tyre përfundimtar ishte Italia. Nga hetimet paraprake, dyshohet se secili prej tyre paguante 2 800 euro për transportin, shuma që për 21 persona do të arrinte në 58 800 euro. Megjithatë, autoritetet nuk kanë konfirmuar nëse këto pagesa janë kryer.

Gjatë operacionit, Policia sekuestroi furgonin që përdorej për transportimin e emigrantëve. 21 shtetasit e huaj u proceduan në gjendje të lirë për veprën penale "Kalimi i paligjshëm i kufirit shtetëror".

Hetimet vijojnë për dokumentimin e plotë të veprimtarisë së dyshuar kriminale dhe identifikimin e personave të tjerë që mund të jenë përfshirë në organizimin e transportit. Materialet procedurale janë referuar Prokurorisë së Sarandës për veprime të mëtejshme.